“Мөрөөдлийн театр”-ын уран бүтээлчид зохиолч Д.Мэндсайханы зохиол, Төрийн соёрхолт, Урлагийн гавьяат зүтгэлтэн, найруулагч Н.Наранбаатарын найруулгаар “Тод хувцастай эмэгтэй” жүжгийг тайзнаа тоглож байгаа билээ. Тэгвэл бид тус жүжгээс дараах таван зүйлийг онцлон хүргэж байна.

-18 ЖИЛИЙН ДАРАА ДАХИН  ШИНЭ БҮРЭЛДЭХҮҮНТЭЙГЭЭР ТОГЛОЖ БАЙНА-

     Тус жүжгийг 2006 онд Урлагийн гавьяат зүтгэлтэн Б.Баатар найруулагчийн найруулгаар, Ардын жүжигчин С.Сарантуяа гол дүрд нь тоглосноор “Ээж ээ” гэх нэрээр хүргэж байсан бол өдгөө 18 жилийн дараа “Мөрөөдлийн театр-ын уран бүтээлчид “Тод хувцастай эмэгтэй” нэрээр шинэ найруулга,шинэ бүрэлдэхүүнтэйгээр тоглож байна. Цолмонгийн дүрд жүжигчин О.Энхтуул тоглож буй юм.

-ХҮНИЙ ХҮҮХДИЙГ ӨӨРИЙН ХҮҮХДЭЭС ИЛҮҮ ХАЙРЛАХ-

   Жүжигт өгүүлж буй гол нэг санаа энэ. Өнөө цагт эсэргээрээ өөрийн хүүхдийг л гэхээс өрөөлийн хүүхэд, бусдын амьдрал хамаагүй гэх хандлага бий. Тэгвэл эл жүжигт харин ч хүний хүүхдийг өөрийн хүүхдээс илүү хайрлан өсгөж, түүнийг хэрхэн зөв замд нь эхийн  хайр энэрлээрээ чиглүүлэн хөтөлж байгааг харуулдаг.  Үүгээрээ хүн чанар, хүнлэг сэтгэл, хүн хүнээ ялгахгүй хайрлах чанарыг ч мөн дуугарч байгаагаараа онцлог юм.

-ЗАЛУУ НАС ДУУСАХ Ч МӨНГӨ ДУУСАХГҮЙ-

          Мөнгөөр бүхнийг шийдэж болдог гэсэн санаа бидний нийгэмд ч өнөөдөр бий. Эд хөрөнгөтэй л бол гоо үзэсгэлэн, гоё сайхан бүхнийг авч болдог гэх санаа мөн энэ жүжигт бий. Тиймдээ ч Ганбаярт уулзаж байсан эмэгтэй нь “Хүн дандаа залуу явдаггүй юм шүү дээ” гэхэд, “Залуу нас дуусах ч мөнгө дуусахгүй” гэдэг. Бүхнийг мөнгөөр шийдэж, бусдыг, тэдний итгэл, сэтгэл, хүн чанарыг ч дэвсэлж буй хүмүүсийг харин ч нэг тод харуулж байна лээ.

  -ХЭЦҮҮ ЦАГТ НЬ ДЭРГЭД НЬ БАЙХГҮЙ БАЙХ-

         Жүжигт мөн л энэ санаа бий. Цолмонгийн том хүү Болдын эхнэр нь түүнийг хамгийн хэцүү үед нь ойлгохгүй орхидог. Хурааж хуримтлуулсан мөнгөө ах, дүүтэй зарцуулж, тэдний асуудалд тусална гэхэд нь дэмждэггүй. Хэцүү бэрх үед хүний мөн чанар танигддагийг ч Цолмон гэх айлын бэрээр төлөөлүүлэн харж болно. Сайн, муу, сайхан, муухай хослон оршиж байдгийг энэ жүжиг Ганбаяр болон бэрийнх нь дүрээр илүүтэй харуулдаг.

-ЭХ ХҮН ҮРДЭЭ БҮХНЭЭ ЗОРИУЛДАГ-

         Үр хүүхдэдээ амиа өгөхөөс ч буцахгүй хүмүүс бол эцэг, эх. Энэ бол жүжгийн гол амин санаа юм. Мөн архичин, тамхичин, хулгайч, дээрэмчин, хамгийн мундаг тамирчин, дарга, сайд аль нь ч байсан хамаагүй бүх цаг үед ижил тэнцүү хайрладаг. Үргэлж үр хүүхдээ даарч, өлсөж байгаа болов уу гэж санаа нь зовж, асууж сураглаж байж санаа нь амардаг. Тэднийг аз жаргалтай, эрүүл энх байлгахын төлөө хичээж, бусдаас харамлаж, хайрладаг. Ээжүүд ийм л байдаг.