ДУЛААХАН ИНЭЭМСЭГЛЭСЭН ДҮҮРЭН АВЬЯАСТАН

Д. Бямбасүрэн:
Соёл урлаг

2023-03-27, 2780

Тэр угаас элдэвтэй "нөхөр" л дөө. Улсын тэргүүний уран сайханч, өгүүллэг, зохиолыг хүний сэтгэлд хүртэл уншигч, драмын театрын тайзан дээр "Дурлахыг хориглоно", "Атга нөж", "Цагаан дарь эх", "Шар тэнгисийн тарчлаан", "Бардам туулай", "Эдип хаан", "Нууц амраг чинь больё", "Харц хатан", "Анухатан", "Парисын дарь эхийн сүм" зэрэг монголын болон дэлхийн сонгодог уран бүтээлд тоглож, хошин урлагийн тайзнаа аав, ах, анд, хүүгийн дүрийг үзүүлж, дэлгэцэд харин цагдаа, дуучин, хэлгүй нэгэн болно.

За тэгээд тоглолтыг бол ганган хөтөлнө,"Уужим" кино фильмийн үүсгэн байгуулагч гээд урлагт ер ороогүй төрөл, барьж аваагүй булан тохой, өөрийгөө сориогүй өдөр ч гэж байхгүй, ээ, түүнд. Үүгээр нь түүнийг элдэвтэй, иртэй, зүтгэлтэй, урлагийн төлөө төрсөн дүүрэн авьяастан гэж боддог юм.

Тэр жүжигчин мэргэжлээрээ хэн бүхний сэтгэлд тайз, дэлгэцийн аль ч дүрээрээ хүрч, очиж, хамгийн нандин утсыг нь хөвөрдөж, хөвсөлзүүлж, эсвэл уярааж, ухааруулж чаддаг уран бүтээлч.

2006 онд Соёл урлагийн их сургуулийг жүжигчин мэргэжлээр төгсөөд тэр театр жүжигчнээр ажиллахын сацуу кинонд ч тоглож эхэлсэн. Хамгийн анхны дэлгэцийн уран бүтээл нь "Ийм нэгэн дурлал". Хөгжилтэй мөртлөө бүтэлгүй, гэнэн томоогүй дүрээр одоо ч үзэгчдийн сэтгэлд тод үлдсэн. Энэ тухай тэр "Нэг үе Монголын кино урлаг уналтад ороод эргэж сэргэсэн шүү дээ. Тэгэхэд суурийг нь тавилцсан цөөн киноны нэг нь энэхүү кино байдаг. Энэ киноноос киночид урам зориг авч ар араасаа олон сайн бүтээл төрсөн. Миний анх тоглосон бүтээл олны таашаалд нийцэхэд урам авч байлаа. Цаашдаа олон кинонд амжилттай дүр бүтээхэд түлхэц өгсөн" гэжээ.

-СОЛИОТ СОДНОМ-

Харин түүний бүтээлүүд дотроос хамгийн оргил нь гэж хэлж болох бүтээл "Мойлхон" киноны солиот Содномын дүр.

Гаднаа солиотой, юу ч ярьдаггүй нэгэн харагдавч дотроо сайхан сэтгэл, мөн чанар нь тэр л хэвээрээ хүний дүр. Үргэлжийн алиа хошин, хөгжилтэй хөөргөн, инээж наргисан Шагайгийн дүр төрхийг эл кино арай өөрөөр буулгаж, дотоод мөн чанарыг нь давхар нээж, илрүүлсэн нь Содном. Өөрөө энэ дүрийнхээ тухай "Зүгээр мөртлөө мэдрэл муутай болж нутаг орны өв соёлоо авч үлдэхийн төлөө тэмцээд яваа залуугийн дүрийг өөр талаас нь харуулсан. Тухайн нийгэмд өөрийгөө авч үлдэхийн тулд овжин сэтгэлгээ гаргаж буй ур чадвар шаардсан дүр байсан" гэсэн. Үнэхээр хүний хайлан хүний дүрийг хайлтал, уяртал бүтээж чадсан даа, тэр. Дэлгэцийн бүтээлээс нь онцлон дурдсан нь энэ хоёр дүр болохоос "Хар сувдны нууц", "Ээжийн дайсан", "Одод болохын хүслэг", "Миний эхнэр тагнуулч", "Ганц бие бүсгүйчүүд" гээд олон ч бүтээлийн гол болон туслах дүрд тоглосон. Харин "Хавтаст хэрэг" киноны мөрдөгчийн дүрээр нэг тийм нягталсан, нухацтай бодсон, таамаглаж, тааварласан, хашир Шагайг харсан. Уншиг та анзаарсан бол хөмсгөө үл ялиг өргөөд, ёжтойхон хараад ирэхээрээ л тэр хэрэг бишдэж, аль нэгэн бүтээлд өөрийгөө дайчилж, тэр бүтээлийнхээ ард гарахын тулд юуг ч үл умартан зүтгэдэг дайчин.

МӨРӨӨДӨЛ БИЕЛЭСЭН ОН ЖИЛҮҮД

Тэрбээр багаасаа л урлагийн хүн болохыг мөрөөддөг байсан гэдэг. Тэгвэл түүний мөрөөдөл биелэж театр, хошин урлаг, дэлгэц гээд бүгдэд орсон. Одоо харин илүү чамбай, чанга, улам ч сайн дүрийг гаргасан чадварлаг нэгэн болохыг зорьж байгаа тэр. Мэдээж авьяас чадвар бий ч түүнийгээ улам бүр хөгжүүлж, хөглөж, туршлагажуулж, бат бөх болгох нь түүнээс ч чухал. Тэр энэ замдаа яваа. Шагай "Би бага байхдаа урлагийн хүн болохыг мөрөөддөг байлаа. Тэр мөрөөдөл маань биелсэн. Оюутан болоод Драмын театрт орохыг мөрөөддөг болсон маань биелсэн. Дараа нь хамт олонтой болох юмсан гэж боддог болсон. Биелсэн. Надад одоо ч том мөрөөдөл байгаа. Гагцхүү тэр мөрөөдлийг бодит зүйл болгох ёстой. Бодит зүйл болгохын тулд хөдөлмөрлөж л явна. Амьдрал бол тэр чигээрээ сонголт байдаг. Хүн алхам тутамдаа янз бүрийн сонголттой нүүр тулгарч байдаг. Тиймээс сонголтоо мэргэн хийх хэрэгтэй. Хамгийн гол нь хүн сонгосон сонголтдоо үнэнч байх хэрэгтэй" гэжээ. Тэр өөрөө ч өгөгдсөн боломжоо алдалгүй атган авч, сонголтондоо мэргэн байж чадаж байгаа.

Түүний хийсэн сонголтоос хамгийн мэргэн нь "Мөрөөдлийн театр. Театрын тайзан дээр жүжигчин Г.Эрхэмбаяр тэр хоёр алтан үеийн мундагуудтай мөр зэрэгцэж,тэднээс суралцаж, битүүхэндээ хөөр баяр болон "нисэж" явахдаа тэр чигтээ нисэн дүүлж, улаан театрынхаа унаган тайзнаа амьдарч, ажиллаж, бүтээснээсээ олон дүрийг бүтээх болох л байсан. Угаас давгүй, ирээдүйтэй, сайн ч ажиллаж байсан.Гэхдээ тэр туурга тусгаарлаж айл болж, бие дааж,өмнөхөөсөө ч том мөрөөдөл тээгээд нөхөдтэйгээ хамтран 2011 онд тусдаа театр байгуулж, хошин урлагийн ч, драмын ч бүтээл хийх болсон. "Мөрөөдөл гэдэг хязгааргүй. Бид мөрөөдлийнхөө хязгааргүй орон зайд уран бүтээлээ хийнэ гэсэн зорилготойгоор театраас гарч "Мөрөөдлийн театр"-ыг байгуулсан" гэх тайлбарыг өгөөд л Оросын алдарт зохиолч Ванпилвийн “Ууган хүү” жүжгээс сэдэвлэсэн “Миний нууц хүү” жүжгээр өндөр үүдээ нээж байлаа анх, тэд. Тэгвэл одоо хэдийнэ арав гаруй жил болж, өнөөдрийг хүртэл тэд үзэгч дүүрэн байсаар байна.

Энэ цаг мөчид ч тэд сэтгүүлч, зохиолч Ц.Балдоржийн зохиолоор бүтсэн "Шөнө буусан аадар" жүжгийг тайзнаа амьдруулж, мөн л зоригтой нүүдэл хийлээ. Тэдний өнөөдрийг хүртэл үзэгч дүүрэн байдаг гол цөм нь том бүтээлийг зоригтой барьж авч, өөрсдийнхөөрөө хүргэж чаддагт байдаг. Шагай ч мөн ялгаагүй нэг байрандаа байдаггүй, шинэлэг уран бүтээлч. Өөрийгөө хувиргах юу л байна тэр галзуу барын аманд гараа хийхээс буцахгүй дайран ордог галтай жүжигчин.

Тиймдээ ч үүсгэн байгуулж, галыг нь түлж, дулаацуулсан "Мөрөөдлийн театр"-аа өнөө хүртэл хөрз, аргалаар өрдөж, пигнэн дулаалсаар халуу дүүгсэн айл болжээ.

Салбараа тэр мөн хамгийн их өмөөрөгч, уран бүтээлчдийнхээ өмнөөс үзэл бодлоо хэлэгч. Хошин урлагийнхныг шүүмжилж, шүүрдэж байхад тэр байр сууриа илэрхийлж байсны дотор "1990 онд ардчилал гарснаас хойш лангуу хоосорсон тэр үеэс хошин урлаг өдийг хүртэл Монголын үзэгчдийг баясгаж, нийгмийн хүнд хэцүү цагт хань болж байсан ганц зүйл шүү дээ. Бага тайзнаас эхлээд өнөөдрийг хүртэл Монголын хошин урлаг, энэ салбарын ах эгч нар маань хүмүүсийг стресстүүлэхгүйн төлөө 20 гаруй жил тасралтгүй, уйгагүй ажиллаж байгаа. Гэтэл өнөөдөр сошиал орчин хөгжөөд ирэхээр “Ишиг эврээ ургахаар эхийгээ мөргөнө” гэгчээр үзэгчид эргээд үзэж байгаагүй юм шиг хошин урлагаа элдвээр муулж эхэлж байгаад энэ жанрт тоглож байгаа хүний хувьд маш их харамсалтай санагдаж байна. Ер нь амьдрал зогсдоггүй л юм бол инээдтэй явдал гарч таарна. Тэгэхээр энэ урлаг бол мөнхийн төрөл" гэж чангахан дуугарч байсан. Ийм л нэгэн ёжтой, янзтай, бүтээлтэй, хаана ч авьяас чадвараа бүрэн дүүрэн дэлгэчих чансаатай уран бүтээлч Монголын урлагт асаж, дүрэлзээд шатаж яваа.

-ШИНЭ ЦАГИЙН ТЭРБИШ-

Яг одоо тайзнаа тоглогдож байгаа "Шөнө буусан аадар" жүжгийн Тэрбишийн дүрийг тэр бүтээж байгаа. Хэдийгээр жүжигт түүний дүрийн жүжиглэлт бага ч бүх үйл явдал түүнийг тойр, төвлөрч өрнөнө. УИХ-ын гишүүн, мөнгөтэй, эрх мэдэлтэй хүний баяр жаргал, зовлонг тэр дүрээрээ дамжуулан харуулна. Гэсэн ч гэр бүлийнхэн нь, эргэн тойрон нь ямар ч байсан түүнд хамгаас эрхэм гэдгийг жүжгийн төгсгөлд өгүүлнэ. Жүжиг, кинонд хүнд хамгийн их зүйл бодогдуулж, бүр ярьж байгаа дүрээсээ илүү өөртөө анхаарлыг татдаг нь үггүй тоглолт байдаг. Үүнийг Г.Алтаншагай сайн тоглож байна лээ. Угаас урлагт тэр одоо дунд үеийн тулхтай уран бүтээлчдийн нэг болж, багийнхныхаа хамгийн цөм дүрийг нуруун дээрээ үүрч гарах, зангидах болсон. Үүгээрээ харин ч түүнд Тэрбишийн дүр илүүтэй зохиж байна уу гэлтэй. Тайз, дэлгэцэд тэр найруулагчийн өгсөн дүрд хэн ч байж болох ч тайзнаас бууж, камераас холдохоороо өнөө л дулаахан инээмсэглэж, хэнтэй ч мэндтэй, устай Шагай бидэнтэй уулздаг хэвээр. Тэр бол Монголын урлагийн зөөлөн сэтгэлтэй, зөв бодолтой, үргэлжийн хүсэл тэмүүлэлтэй Г.Алтаншагай мөнөөс мөн билээ.

ДУЛААХАН ИНЭЭМСЭГЛЭСЭН ДҮҮРЭН АВЬЯАСТАН

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.eccold.top хариуцлага хүлээхгүй.

Нийт сэтгэгдэл: 2

Сэтгэгдэл үлдээсэн: 2023-04-23 23:32:56

Таныг шүтэн бишрэгч ээсэн...: Үнэхээр л элдэвтэй авьяастай чадварлаг хүн. Авьяасыг нь дурдвал барагдахгүй тийм л эрүүл чийрэг эрч хүчтэй галтай цогтой нэгэн. Амжилт. Хайртай шүү
Сэтгэгдэл үлдээсэн: 2023-03-27 18:26:51

Otgoo: mash avyaslag jujirchin shuu