Нийслэлийн иргэдийн амралт, чөлөөт цагаа өнгөрүүлэх газруудыг нэмэгдүүлэх, тэдгээрийг тохижуулах зорилгоор 22 байршилд газар чөлөөлж буй. Энэ хүрээнд Нийслэлийн Засаг даргын А/740 тоот захирамж гарч, Дархан цаазат Богдхан уулын тэнцвэрт байдал, ой, ургамалд сөрөг нөлөөтэй байгууламжуудыг буулгаж эхэлсэн билээ. Тухайлбал, Хан-Уул дүүргийн 11 дүгээр хорооны нутаг Ар Зайсангийн гудамжинд байрлах хийц бүтээцэд нь ан цав, цууралт үүсэж, ноцтой эвдэрч гэмтсэн барилга байгууламжуудыг албадан буулгах ажлыг өчигдрөөс эхлүүлээд байна.

     Хотын дарга Д. Сумъяабазар хэлэхдээ “Богд уулын Дугуй цагаан руу алхдаг хэсгийн шавар гэрүүдийг буулгаж эхэлсэн. Тухайн компанид бид шаардлага тавиад бүтэн жил хүлээлээ. Одоо албадан буулгаж байна. Энэ мэт иргэдийн ая тухыг алдагдуулан зөвшөөрөлгүй барьсан нийт 22 байршлыг буулгах арга хэмжээ авна. Тухайн байршилд амралт зугаалгын цогцолбор байгуулна” гэсэн билээ.

          Тэгвэл албадан буулгасан уг гэрүүд нь Монголын үндэсний их сургуулийн эзэмшлийн газарт баригджээ. Барьсан компани “Энигма” ХХК буюу МҮИС-ийн охин компани аж. Анх нэг толгойтой, гурван компанийн нэрээр 40 гаруй га талбайг газрыг эзэмших эрхээр авч байсан аж. Мөн ташрамд дурдахад, тус компани газрын маргааны асуудлаар БОАЖЯ-тай олон жил шүүхдэлцэж, яамны ажилтнуудыг МҮИС-ийн оюутнууд зодож, танхайрч байсан удаатай.