Цагдан хорих ангийн эмнэлэгт хэвтэн эмчлүүлж байгаа Д.Эрдэнэбилэгт илт давуу байдал олгосон, эрх мэдэл, албан тушаалын байдлаа урвуулан ашиглаж, хоригдож байгаа хүнийг нууцаар эргэхийг завдсан, уг хэргийг бүлэглэж хийсэн байж болзошгүй үндэслэлээр хоёр ч хүнийг ажлаас нь чөлөөлөх санал Шүүхийн шийдвэр гүйцэтгэх ерөнхий газрын дарга Д.Загджавын ширээн дээр байгаа талаар бид өмнө нь мэдээлсэн. Тодруулбал, Д.Эрдэнэбилэгийг нууцаар эргэхийг завдаж, бусдад дарамт шахалт учруулсан гэх үндэслэлээр Нийслэлийн Шүүхийн шийдвэр гүйцэтгэх газрын дарга, хурандаа Х.Оюунболд, Цагдан хорих 461 дүгээр ангийн дарга Ч.Мөнх-Эрдэнэ нарыг ажлаас нь чөлөөлөх санал гаргасан гэх.

          Тэгвэл Нийслэлийн шүүхийн шийдвэр гүйцэтгэх газрын дарга Х.Оюунболдыг асуудалд холбогдсон өдөр нь ШШГЕГ-ын дарга хурандаа Д.Загджавын тушаалаар ажлаас нь чөлөөлжээ. Түүний оронд Шүүхийн шийдвэр гүйцэтгэх ерөнхий газрын Шүүхийн шийдвэр гүйцэтгэх албаны дарга, дэд хурандаа Б.Дашдавааг томилсон талаар эх сурвалж мэдээллээ.

Энэ талаар Нийслэлийн шүүхийн шийдвэр гүйцэтгэх газрын Тэргүүн дэд дарга, хурандаа Н.Цэвэлмаагаас тодруулахад “Х.Оюунболд даргыг өнгөрсөн пүрэв гарагт буюу тавдугаар сарын 26-нд ажлаас нь чөлөөлсөн нь үнэн. Одоо манай газрын даргаар Б.Дашдаваа гэж хүн ажиллаж байна” гэлээ.