Сэлэнгэ аймгийн Ерөө сумаас Сяньбигийн үед хамаарах, 1800 жилийн өмнөх язгууртны хөндөгдөөгүй бунхан илэрчээ.

Энэхүү археологийн нээлт нь Сяньбигийн соёл, түүхийг судлахад үнэтэй хувь нэмэр болохуйц, одоогоор олдоод буй хамгийн анхны томоохон хэмжээний тоногдоогүй язгууртны булш гэж үзэж байна. МУИС-ийн Нүүдэлчдийн археологийн хүрээлэнгийн судалгааны баг 2019 оны намар дурсгалт газрыг анх тогтоож, улмаар 2022-2024 оны хооронд хэмжилт болон 3D баримтжуулалтын ажлыг хийжээ. Судалгааны явцад язгууртны нэг булш нь ямар ч хөндлөнгийн нөлөөгүй, бүрэн бүтэн хадгалагдан үлдсэн болох нь тогтоогдсон байна. Түүнчлэн уг булшнаас гадна жирийн иргэдийн хоёр булш илэрч, археологийн авран хамгаалах малтлагын ажлыг явуулжээ.

 Малтлагын явцад тахилын хэсгээс хар болон зээрд зүсмийн модон хоёр морь, модон сүйх тэрэг, ташмаг хэлбэрийн шавар ваар зэрэг дурсгалт олдворууд илэрсэн нь тухайн үеийн язгууртны оршуулгын ёс, эдэлж хэрэглэж байсан зүйлсийг судлахад чухал мэдээлэл болж байна. Олдворуудыг зөөвөрлөх, хадгалах, сэргээн засварлах ажлыг Соёлын яам, Соёлын өвийн үндэсний төв болон бусад холбогдох мэргэжлийн байгууллагууд хамтран гүйцэтгэж байгаа бөгөөд судалгааны үр дүнг олон нийтэд танилцуулах ажил цаашид үргэлжлэх ажээ.