Нийслэлийн удирдах ажилтнуудын ээлжит шуурхай зөвлөгөөн өнөөдөр боллоо. Зөвлөгөөнийг Нийслэлийн Засаг даргын орлогч Т.Даваадалай удирдан явуулж, өмнөх зөвлөгөөнөөр өгсөн 28 үүрэг даалгаврын дундаж хэрэгжилт 77.6 хувьтай байгааг танилцууллаа. 2025-2026 оны өвөлжилтийн бэлтгэл долдугаар сарын 21-ний байдлаар 53.7 хувьтай байна. Энэ хүрээнд нийслэлд 13.5 км дулааны шугам сүлжээг шинэчилж байгаа бөгөөд ажлын явц 52 хувьтай, авто зам засвар шинэчлэлийн ажил 60 хувьтай үргэлжилж байна. Он дамжин 31 байршилд 80.5 км авто зам, Нийслэлийн замын сангийн хөрөнгөөр 8 байршилд 12 км, Дэлхийн банкны санхүүжилтээр 2 байршилд 8.4 км буюу нийт 100.9 км авто зам барихаар төлөвлөжээ. Үүнээс гадна угсармал орон сууцны 205 блокийг дулаалахаар төлөвлөж, 21 блокт тендер зарлаад байна. Чингэлтэй, Баянгол дүүргийн таван хорооны 5000 өрхийг энэ онд хийн халаагуурт шилжүүлнэ. Мөн нийтийн эзэмшлийн 42 ширхэг лифт шинэчлэх ажил 50 хувьтай, явган хүний 54.2 км урт, 199 мянган м.кв талбайн тохижилтын 13 төсөл хэрэгжиж байна. Үүнээс хоёр нь гэрээний шатанд байна. Боловсролын салбарт 139 төсөл хэрэгжиж байгаагаас энэ оны долдугаар сарын байдлаар 15 барилга ашиглалтад орсон байна. Үүнд дөрвөн сургууль, зургаан цэцэрлэг, дөрвөн сургууль-цэцэрлэгийн цогцолбор, нэг спорт заал багтжээ.

Шуурхай зөвлөгөөнөөр:

Өвөлжилтийн бэлтгэлийг эрчимжүүлэх

Сургууль, цэцэрлэгийн орчны аюулгүй байдлыг хангаж, замын тэмдэг тэмдэглэгээг есдүгээр сарын 1-ний дотор гүйцэтгэх.

Цахилгаан, дулаан, шугам сүлжээний засварын хөрөнгө оруулалтын тооцоог шуурхай гаргаж танилцуулах.

Халтиргаа гулгааг арилгах тусгай зориулалтын бодис, элс, давсыг нөөцөлж, агуулах сав бэлтгэх.

Хуучирсан халаалтын систем, гадна инженерийн шугам сүлжээг засварлаж, тогтмол хяналт тавих.

Явган болон авто замын бүтээн байгуулалтын ажлуудыг эрчимжүүлэхийг холбогдох байгууллагуудад үүрэг болголоо.