"Хэвлэлийн эрх чөлөө гавлагдав" цуглаан зохион байгуулах талаараа Монголын Сэтгүүлчдийн Нэгдсэн Эвлэлээс мэдээлэл өгч байна. Энэ үеэр МСНЭ-ийн мэргэжлийн ёс зүй, хууль эрх зүй хариуцсан дэд ерөнхийлөгч З.Боргилмаа мэдээлэл өглөө.

         Тэрбээр “Илт худал мэдээлэл, бусдын нэр хүндэд халдсан мэдээллийг олон нийтэд түгээсэн бол Эрүүгийн гэмт хэрэг гэж үзэх заалтын дагуу нэг редакц дээр 10 гаруй хэрэг, нэг редакцын 7-8 сэтгүүлч дээр зэрэг хэрэг үүсгэж, шалгаж байна. Эрүүгийн хууль энэ салбарыг айлгах, олноор нь хоморголох маш том хавх бий болгочихож. Эрүүгийн хуулийн дагуу сэтгүүлчийг шалгахдаа эрхийг нь хэтрүүлж хязгаарладаг, үүсээд байгаа үр дагаврыг нь тооцолгүйгээр давсан байдлаар эрхийг нь хязгаарлаж шалгаж байна. Жишээ нь сэтгүүлч Н.Өнөрцэцэгийн хэрэг байна.  Хэргийг нь шалгаад прокурор руу  хяналтын шат руу явуулсан хэр нь мэргэжлийн эрхийг нь хязгаарласан хэрэг гарсан. Сүүлийн 30 жил Монгол Улс чөлөөт хэвлэлтэй ардчилсан улс болж хөгжиж байна. Эрүүгийн хуульд илт худал мэдээлэл бэлтгэх замаар бусдын нэр хүндэд халдах гэмт хэрэгт төдийгүй арав гаруй зүйл заалтаар сэтгүүлчийн мэргэжлийн эрх, үйл ажиллагааг болон иргэдийн мэдэх эрх, хэвлэлийн эрх чөлөө, үгээ хэлэх үзэл бодлоо илэрхийлэх эрх чөлөөг хязгаарласан заалт байна гэж судалгаагаар гарч ирсэн. Төрийн нууц гэсэн хэмжээ хязгааргүй хэзээ ч тэсэрч мэдэх талбай дээр ажиллаж байна. Бидэнд мэргэжлийн эрх ашгийг хамгаалсан хуулийн зүйл заалт, эрх зүйн орчин байхгүй байна. Сүүлийн үед иргэн яаж энэ мэдээллийн олж авч нийтэлсэн бэ гэдгийг буруутгалыг сэтгүүлчид дээр тохож байна. Би хэвлэн нийтлэх үйл ажиллагаа эрхэлдэг сэтгүүлч учраас энэ зүйлийг мэдээлсэн юм гэхээр сэтгүүлч гэж хэн юм бэ, сэтгүүлчийн мэргэжлийн эрх ашиг гэж  юу юм бэ гэдгийг баталгаажуулсан хууль эрх зүйн орчин байхгүй байна. Хууль хүчний байгууллага, хэвлэлээр эрх ашиг нь хөндөгдсөн эрх мэдэлтэн, авлигачид, дур зоргоороо ажиллах захиалга өгөх иймхэн орон зайнд биднийг улам бүр шахаж байна. Хэрэв худал мэдээлэл эрүүгийн гэмт хэрэг юм бол шүүхээр орж байж үнэн, худлыг нь тогтоох ёстой биз дээ. Шүүхийн шийдвэр эцсийнх байдаг. Түүнд үндэслэж бусдыг гэм буруутай эсэхийг тогтооно гэдэг зарчим хаана байна. Мэргэжлийн үйл ажиллагаа, хэвлэлийн эрх чөлөөнд заналхийлж байгаа хавх шиг олон заалтуудыг чөлөөлмөөр байна” гэв.