Цагдаагийн ерөнхий газрын Тээврийн цагдаагийн албанаас замын хөдөлгөөн соёлтой оролцож, зам тээврийн осол, гэмтлээс урьдчилан сэргийлэх уриалга дэвшүүлдэг нөлөөллийн аян энэ жил “Нэг зам-Нэг соёл” уриа дор зохион байгуулагдаж байна. Аяны хүрээнд Баянзүрх дүүргийн Замын цагдаагийн хэлтэс орон нутгийн зам дагуу шалгалт хийж, замын хөдөлгөөнд соёлтой оролцож буй жолоочдыг “Монгол эм импекс концерн” компанийн гарын бэлгээр урамшууллаа.

       Хяналт, шалгалтын үйл ажиллагааны үеэр Баянзүрх дүүргийн цагдаагийн газрын Замын цагдаагийн хэлтсийн зохицуулагч, цагдаагийн дэслэгч Л.Гомбо-Очир мэдээлэл өглөө. Тэрбээр “Тээврийн цагдаагийн албанаас жил бүр уламжлал болгон зохион байгуулдаг нөлөөллийн аян энэ жил “Нэг зам нэг соёл” нэртэйгээр зохиогдож байна. Орон нутгийн замд иргэд хамгийн ихээр зорчдог сард хүний амь нас, эд хөрөнгийг хамгаалах үүднээс энэхүү аян хэрэгжүүлдэг. Аян зохиог байгуулснаар зам тээврийн осол 5.1-80.5 хувь хүртэл буусан. Өнгөрсөн жил нэг газар энэ аяныг зохион байгуулж байсан бол энэ жил таван цэгт аяны нээлтийг хийж, үе шаттайгаар иргэдэд хүргэж байна. Орон нутгийн зам дээр зорчиж байгаа жолоочид хурд хэтрүүлэх, ядарсан үедээ тээврийн хэрэгсэл жолоодох,хамгаалах бүс болон тээврийн хэрэгслийн бүрэн бүтэн байдлыг хангаагүй, шөнө замын хөдөлгөөнд оролцохдоо гэрлээ шилжүүлээгүйн улмаас зам тээврийн осол гарах эрсдэл нэмэгдэж байна” гэв.

      “Монгол эм импекс концерн” компанийн төсөлт хөтөлбөр, сургалтын албаны ахлах менежер Э.Булган “Нэг зам-Нэг соёл” аяны хүрээнд “Монгол эм импекс концерн” компани нийгмийн хариуцлагын хүрээнд хамтарч ажиллаж байгаа. Монгол Улсад эм ханган нийлүүлэх ууган байгууллага болох манай компани 100 жилийн ойг баярыг тохиолдуулан замын хөдөлгөөндөө соёлтой оролцож байгаа 100  жолоочид гарын бэлэг өгч байгаа. Зам дээр ажиллахад орон нутаг явж байгаа жолоочид бүсээ бүсэлсэн, дүрмээрээ явж байгаа нь харагдаж байна” гэв.