“Оном” сангийн тэргүүн Д.Наранбаатар Т.Мөнхсайханыг Эрүүл мэндийн сайдаар ажиллаж байх хугацаанд нь Эрүүл мэндийн яам Дэлхийн эрүүл мэндийн байгууллагаас зөвшөөрөгдөөгүй оношлуур, тоног төхөөрөмжийг 18 тэрбум төгрөгөөр худалдан авч, шахсан гэх ноцтой мэдээллийг олон нийтэд дэлгэж байсан юм. Тухайн үед Эрүүл мэндийн сайд асан Т.Мөнхсайхан дээрх мэдээллийн талаар “Би сайд болсноос хойш 18 тэрбум төгрөгөөр тоног төхөөрөмж аваагүй. Дэлхийн банкны цахим эрүүл мэнд төслийн хүрээнд зургаан сая долларын цахим программын асуудлыг ярьсан юм болов уу гэж ойлгосон. 2018 онд цахим программыг худалдан авах тендерийн хороо байгуулагдсан байдаг. Тэгээд 2020 оны зургаадугаар сард тус тендерийн сонгон шалгаруулалт болоод дуусчихсан юм билээ. Би 2020 оны долдугаар сард Эрүүл мэндийн сайдаар томилогдсон. Би энэ асуудалд холбогдох ямар ч үндэслэл уялдаа холбоо байхгүй. Намайг гүтгэсэн Д.Наранбаатарыг  шалгах ёстой хууль хяналтын байгууллагад нь өгч шалгуулна” хэмээн тайлбарлаж байсан юм.

  Т.Мөнхсайханаас дээрх хэргийг хэрхэн шийдвэрлэсэн болон, “Оном” сангийн тэргүүн Д.Наранбаатарыг хуулийн байгууллагад өгч, шалгуулсан эсэх талаар тодруулаа. Тэрбээр “Би тухайн үед энэ талаар тайлбар мэдээлэл өгч байсан. Энэ асуудал тэгээд л намжсан. Намайг 18 тэрбумын хэрэгт холбогдуулан гүтгэсэн “Оном” сангийн тэргүүн гэх Д.Наранбаатарыг хуулийн байгууллагад өгч шалгуулаагүй” гэв.