УОК, Засгийн газар хуралдаанаас гаргасан шийдвэрийг Ерөнхий сайд Л.Оюун-Эрдэнэ танилцуулсан юм. Харин энэ үеэр УОК-ын Нарийн бичгийн дарга Т.Баярхүү боомт болон гадаадаас Монгол Улсад ирсэн иргэдийн тусгаарлалтын талаар мэдээлэл өглөө.

   Тэрбээр “Цар тахалтай холбоотой бүх хорио, хязгаарлалтыг өнөөдөр цуцалсан. Гэсэн ч боомтуудад улбар шар түвшинг баримталж ажиллана. Мөн төрийн албаныхан өндөржүүлсэн бэлэн байдалд ажиллана. 2021 оны тавдугаар сараас эхлэн үе шаттайгаар хил гаалиа нээсэн. Монгол Улсад гадаадын иргэн зорчихын тулд сөрөг гэсэн шинжилгээний хариутай байх ёстой. Түүнчлэн Монгол Улсад үнэ төлбөргүй вакцин хийлгэх боломжтой. Мөн гадаад улсаас ирсэн иргэдийг гурван өдөр тусгаарладаг журмыг цуцалсан. Энэ нь албан ажил болоод аялах зорилгоор Монгол Улсыг зорьж буй иргэдэд хүндрэлтэй байсан. Тиймээс гадаадын иргэдийг тусгаарлахгүй. Манай улсад Омикрон хувилбарын BA-1 хувилбар тархаад байсан бол халдварын давлагаа үндсэндээ буурч байна. Нэгдүгээр сарын дунд үетэй харьцуулахад 50 орчим хувиар багассан. Гэсэн ч иргэд амны хаалтаа зүүж, гараа тогтмол ариутгах, агаар сэлгэлт хийж өөрийгөө болон хайртай дотнын хүмүүсээ халдвараас хамгаалаарай” гэв.