Сэтгүүлчдийн амь насанд заналхийлсэн асуудлаар сэтгүүлч нар мэдээлэл хийлээ.

     Энэ үеэр сэтгүүлч У.Оргилмаа “Зариг.мн мэдээллийн сайт хөгжлийн банкны зээлдэгч нарын талаар мэдээлэл дэлгэсэн. Мэдээллийн доорх сэтгэгдэл хэсэгт би “Мондулаан” компани бол Ё.Отгонбаяр гэдэг хүнээс илүү барилга хот байгуулалтын дэд сайд асан Ш.Лхамсүрэн гэдэг хүнийх гэсэн мэдээллийг нэмж бичсэн. Гэтэл миний сэтгэгдлийн доод талд Ё:Отгонбаяр “Тийм ээ, би 2012 онд энэ хүнтэй гэрлэсэн” гээд бичсэн байсан. Би маргааш нь өөрөөс нь шинэ уран бүтээл номыг нь худалдаж аваад баяр хүргэчихээд, 30 минутын дараа юм бичихээр нь ороод хартал “Зариг.мн сайттай чинь хамт ална” гээд бичсэн байсан. Энэ бол МАН-ын зөвлөх, Монгол Улсын Ерөнхий сайдын зөвлөх хүнийхээ хувьд байж болохооргүй ёс зүйн алдаа, эрүүгийн хуулийн 13.5.1-т заасан бусдад хүч хэрэглэхээр сүрдүүлсэн гэсэн тодорхой заалттай эрүүгийн хэрэг учраас эрүүгийн хэрэг үүсгэх шаардлагатай гэж үзээд, Эрүүгийн цагдаагийн албанд мэдүүлгээ өгөөд, тэмдэглэл хөтлүүлээд бүх зүйлийг ёс журмынх нь дараа явна гэж бодсон юм. Өнөөдөр өглөө надаас ил болон цахимаар уучлалт гуйсан ч энэ асуудал бол бидний хүрээнээс хэдийн хальсан. Ийм тодорхой заналхийлэлд би ил гарч дуугарахгүй юм бол цаашид дараагийн залуу сэтгүүлчдэд, өнөөдөр ажлаа хийж яваа нийт сэтгүүлчдэд хэзээ, хэнээс дарамт ирэхийг мэдэхгүй байна” гэв.