Иргэдэд цагаан сарын хэвийн боов болон бусад хүнсний багц тарааж байгаа талаар УИХ-ын гишүүд мэдээлэл хийлээ. Энэ үеэр УИХ-ын гишүүн С.Одонтуяа "Нэг удаагийн бэлэг тараахаас илүү аймаг, нийслэл, дүүргийг яаж хөгжүүлэх вэ гэдэгт илүү анхаарах хэрэгтэй байна. Ер нь бэлэг тараах нь сөрөг үр дагавартай. Мөнгөний уралдаан болдог. Ялангуяа эмэгтэйчүүд, залуучууд улс төрд ороход маш их саад болж байгаа. Тиймээс УИХ-ын Сонгуулийн хуулийг боловсронгуй болгоход шийдэл гаргаж ажиллах ёстой. Утаа, хөрсний бохирдол, түгжрэлээ шийдмээр байна. Татварын орчныг улам таатай болгож, өрхийн бизнесийг дэмждэг, хавдрын эсрэг үйл ажиллагааг эрчимжүүлж, эмнэлэг, сургуулиа барих ёстой гэдгийг иргэд ярьж байна.

   Сонгогчдын боловсрол нэмэгдэж байхад улстөрчид шийдэл гаргахгүй байж болохгүй. Тиймээс бидний зүгээс шийдлийг санал болгож байна. УИХ-ын гишүүдийн хэрэгжүүлж буй ажлуудаас иргэдийн сэтгэлд нийцэж, дэмжлэг авч буй олон төсөл, хөтөлбөр бий" гэлээ.