Сэлэнгэ аймгийн Засаг дарга Ш.Оргил эрүүл мэндийн шалтгаанаар үүрэгт ажлаасаа чөлөөлөгдөх хүсэлт гаргаснаа албан ёсоор мэдэгдлээ.Тэрээр 2020 оны арваннэгдүгээр сард хагалгаанд орж, хагалгааны шарх нь эдгээгүй байхад нь цар тахал гарч хоёр сарын хугацаанд ажил дээрээ байрлан аймгийн Онцгой комиссыг чиг үүргээр ханган ахалж ажиллаж байжээ. Энэ нөхцөл байдлын улмаас хагалгааны дараах гам алдалт болж, одоо тэрээр дахин яаралтай хагалгаанд орох болсон байна.

    Иймд тэрээр эрүүл мэндээ бодож, төрийн ажлыг цалгардуулахгүйн улмаас өөрийн хүсэлтээ Монгол Улсын Ерөнхий сайдад албан ёсоор илгээжээ. Засаг дарга Ш.Оргилын тухайд улиран сонгогдсон анхны дарга бөгөөд бүрэн эрхийнхээ хугацаанд аймгийн боловсрол, эрүүл мэндийн салбарт хамгийн их хөрөнгө оруулалтыг хийсэн гэдгээрээ онцлогтой. Мөн тэрээр өөрөө санаачлан, баг хамт олонтойгоо хамтраад 120 айлын төрийн албан хаагчийн байр барьж ашиглалтад өгсөн гээд түүхэн гавьяатай бүтээн байгуулалт хийсэн юм. Энэ ажлаа тэрээр цаашид үргэлжлүүлнэ, 1000 болгоно хэмээлээ. Түүний санаачилж хэрэгжүүлсэн энэ том ажлыг Монгол Улсын Ерөнхий сайд улсын жишиг ажил болгон үргэлжлүүлнэ хэмээн хэлж байсан юм. Мөн тэрээр манай баг хамт олон ковидын хүнд нөхцөлд ч сайн ажиллаж ирсэн. Одоо ч ажилласаар байгаа гэдгийг онцолсон байдаг.