Жүдо бөхийн 2018 оны  УАШТ-ий 60 кг-ын жингийн аварга, “Иппон тропи” шагналын эзэн ОУХМ Ганхуягийн Мөнхбат 1993 оны энэ өдөр Сүхбаатар аймгийн Түмэнцогт суманд мэндэлжээ. “Алдар” спорт хорооны тамирчин Ганхуягийн Мөнхбат самбо бөхийн Монгол Улсын дөрвөн удаагийн аварга, жүдо бөхийн улсын аварга билээ.

    Тэрбээр самбо бөхийн насанд хүрэгчдийн дэлхийн цомын алт, мөнгөн медальтай. Азийн аварга шалгаруулах тэмцээний мөнгө, хүрэл медальтай манай улсын шилдэг самбочдын нэг билээ. Жүдо, самбо бөхийн төрлөөр 16 дахь жилдээ хичээллэн, барилдаж яваа. Жүдо бөхийн спортын мастер цолтой. Харин самбо бөхийн Олон улсын хэмжээний мастер цолтой. Анх түүнийг Монгол Улсын гавьяат тамирчин О. Ууганбаатарын дүү О. Ариунбаатар Спортын төв ордонд самбо бөхийн зааланд даагуулж очин, Эрдэнэбат багштай уулзуулжээ. Тэр үеэс эхлэн самбо бөхөөр хичээллэх эхлэл тавигдсан юм билээ.