Монгол Улсын нийслэл Улаанбаатар хотод олон улсын хүүхдийн спортын Х их наадам наймдугаар сарын 6-10-ны өдрүүдэд болж  өндөрлөсөн.  Энэ удаагийн наадамд Монгол, ОХУ, БНХАУ-ын нийт 460 тамирчин спортын есөн төрөлд өрсөлдлөө. Тус наадмын дүн гарахад, Монгол Улсын баг 101 медаль (алт 35, мөнгө 34, хүрэл 32)-тайгаар тэргүүлсэн байна.

         Хятадын баг нийт 61 медаль (алт 23, мөнгө 12, хүрэл 26)-тайгаар дэд байр, ОХУ-ын баг нийт 53 медаль (алт 8, мөнгө 20, хүрэл 25)-тайгаар удаах байрт оржээ. Энэ наадмын хамгийн отгон оролцогч нь өдгөө 13 настай теннисчин Б.Болор-Эгшиглэн байсан байна. Тэрбээр "Токио-2020" олимпын наадмын оролцогч Б.Болор-Эрдэнийн төрсөн дүү аж. Монгол Улсад дөрөв дэх удаагаа болсон тус наадмын онцлох зүйл нь үзүүлэх тоглолтоор үндэсний бөх, үндэсний сур харвааг багтсаан байна. ХI удаагийн хүүхдийн спортын олон улсын их наадам 2025 онд БНХАУ-ын ӨМӨЗО-д зохион байгуулагдах юм байна.