Энэ өдөр иогийн спортын ДАШТ-ий тавдугаар байрын шагналт “Abi Yoga” төвийн багш, уран нугараач МУСТА Э.Азбилэгт мэндэлжээ. Тэрбээр есөн настайгаасаа эхлэн уран нугаралтаар хичээллэсэн байдаг. Циркийн Б.Отгонцэцэг багшийн шавь болоод  нугаралтын төрлөөр багаараа дэлхийн “А” зэрэглэлийн тэмцээнд орж мөнгө, хүрэл цомуудыг хүртсэн байдаг. 2013 онд Э.Азбилэгийн уран нугаралтыг багийн охидын тэр амжилтыг Монгол Улсын төр засгаас үнэлж МУСТА цолоор шагнаж байлаа.

         Харин Э.Азбилэг иогийн спортоор хоёрхон жил хичээллээд иогийн ДАШТ-д тавдугаар байрт шалгарч байсан билээ. Тэрбээр уран нугаралтын хажуугаар олон төрлийн фитнест явж үзжээ. Фитнесийн багш нар түүнийг “Чи фитнесийн тэмцээнд орох уу. Тэмцээнд орвол амжилт гаргах, ирээдүй харагдаж байна” гэсэн санал тавьдаг байсан гэдэг. Гэхдээ Э.Азбилэг “Фитнес миний явах ёстой төрөл, зүйл биш юм байна гэдгийг мэдэрсэн” гэнэ билээ. Түүнд  “Нарны цирк”-ийн нугараач ”Чи иогийг сонирхож үзээрэй” гэсэн саналыг тавьжээ. Тэр саналын дагуу “Намастэ” иогийн төвд орж, иогийн багшийн сургалтад сууж төгссөн гэсэн. Түүнээс хойш иогт маш ихээр татагдаж эхэлжээ.