Олимп, дэлхийн аваргаас медаль хүртсэн тамирчдыг сар бүр урамшуулах зарлигийг 2012 онд тухайн үеийн Ерөнхийлөгч Ц.Элбэгдорж гаргаж, Ерөнхий сайд Н.Алтанхуягийн Засгийн газар хэрэгжүүлсэн түүхтэй. Өнгөрсөн  2023 онд л гэхэд 67 тамирчин сард 154 сая төгрөг, жилд 1.848 тэрбум төгрөгийн мөнгөн урамшуулал хүртжээ. Харин 2023 онд Засгийн газрын хуралдаанаар олимп, паралимпын наадам, дэлхийн аварга шалгаруулах тэмцээн болон бусад спортын наадам, тэмцээнд амжилт гаргасан тамирчин, түүний дасгалжуулагч нарт Засгийн газраас олгогддог мөнгөн шагнал, сар бүрийн урамшууллыг ёс зүйн дүрэм болон хуулийн хариуцлага хүлээсэн тамирчин, дасгалжуулагч нарт олгохгүй байх зохицуулалтыг шинээр тусгасан билээ. Тамирчдад сар бүр олгох урамшууллын хэмжээг дараах байдлаар тогтоосон байдаг. Үүнд:

1. Олимпын наадмаас алтан медаль хүртсэн тамирчинд дөрвөн сая төгрөг.
2. Олимпын наадмаас мөнгөн медаль хүртсэн тамирчинд гурван сая төгрөг.
3. Олимпын наадмаас хүрэл медаль хүртсэн тамирчинд хоёр сая төгрөг.
4. Дэлхийн аварга шалгаруулах тэмцээнээс олимпын спортын төрөлд алтан медаль хүртсэн тамирчинд хоёр сая төгрөг.
5. Дэлхийн аварга шалгаруулах тэмцээнээс олимпын спортын төрөлд мөнгөн медаль хүртсэн тамирчинд нэ сая төгрөг.
6. Дэлхийн аварга шалгаруулах тэмцээнээс олимпийн спортын төрөлд хүрэл медаль хүртсэн тамирчинд 500 мянган төгрөгийн урамшуулал тус тус хүртэнэ.

     Харин олимп, дэлхийн медальтай тамирчин нас барсан тохиолдолд тухайн тамирчны эхнэр, нөхөр, хүүхэд хүсэлт гаргавал нэг жилд олгогдох урамшуулалтай тэнцэх хэмжээний буцалтгүй тусламжийг нэг удаа олгох гэж заасан байна.