Монгол Улсын дархан аварга Г.Өсөхбаяр өнөөдөр Хөдөлмөрийн баатар цол хүртлээ.

          Тэрбээр "Хөдөлмөр зүтгэлээ үнэлүүлж, төрийн эрхэм дээд цол хүртсэндээ баяртай байна. Анх 12 насандаа аймгийнхаа хүүхдийн барилдаанд түрүүлж байснаас хойш 40 жил өнгөрсөн байна. Монгол Улсын даян аварга олон түмэндээ "буур" хэмээн алдаршсан өвөөгийнхөө удмыг залгаж, үндэсний том дархлаа, үнэт өв соёл болсон монгол бөхөөр тууштай хичээллэж, хөдөлмөрлөж, Монгол төрийнхөө наадамд дөрвөн удаа түрүүлж, Монгол Улсын дархан аварга хэмээх цолыг хүртсэн. Үүнээс гадна чөлөөт бөхөөр хичээллэж, олимпод оролцож, дэлхийн аваргын шагналт байр, Ази тивийн аваргын алтан медаль, дэлхийн цомын хүрэл медаль гэх амжилтуудыг гаргаж байлаа. Мөн бөхийнхөө залгамж халааг бэлдэх зорилгоор байгуулсан "бөх билэгт" дэвжээний маань бөхчүүд сайхан амжилт үзүүлж байгаад баяртай байдаг. Өнөөдөр миний удирдан ажиллаж байгаа Батлан хамгаалах яамны харьяа Зэвсэгт хүчний алдарт спорт хороо бол Монголын спортын ууган тэргүүлэгч том байгууллага. Энэ хугацаанд хамт олон дотроос минь Хөдөлмөрийн баатар, Гавьяат тамирчин, дасгалжуулагч 22, дэлхийн аваргын алт, мөнгө, хүрэл медальтай  25 тамирчин төрсөн байна. Энэ жил Парис хотноо болох олимпын наадамд Монгол Улсын 33 тамирчин оролцохоос манай 14 тамирчин бэлтгэл сургуулилтаа базааж байна. Тэгэхээр энэ бол бидний хамтын хөдөлмөрийг үнэлсэн шагнал боллоо. Төрийн наадамд зодоглож цолоо дуудуулна" гэв.