Муайтай боксын дэлхийн аварга Цэрэнхандын Амарсанаа 2001 оны энэ өдөр Хэнтий Аймгийн Хэрлэн сум, Өндөрхаан хотод мэндэлжээ. Тэрбээр кикбоксын “Чикара дожо” клубийн тамирчин, муайтай боксын хагас мэргэжлийн дэлхийн аварга юм. Тэрбээр 2024 оны гуравдугаар сарын 10-17-ны өдрүүдэд зохион байгуулагдсан тулааны урлагийн VI их наадмын, муайтай боксын дэлхийн аварга шалгаруулах тэмцээнд 57 кг-ын жинд тулалдан өрсөлдөгчдөө ялж, алтан медаль, аваргын бүсийг хүртсэн юм.

     Ц.Амарсанаа тулааны спортоор 2019 оноос эхлэн хичээллэсэн. Тэр дунд сургуулийн сурагч байх үедээ хөнгөн атлетикаар хичээллэдэг байж. Ангийнхаа хөвгүүдийг дагаж анх боксын спортоор сонирхон хичээллэсэн байдаг. Муайтай боксын дэлхийн аварга дээр дөрвөн орны тамирчинтай тулалдсан. АНУ-ын аварга Kyle Metzel  хэмээх хүчтэй, шилдэг тамирчныг буулган авч ялалт байгуулж байлаа.