Арабын Нэгдсэн Эмират Улсын Абу Даби хотод болж буй жүдо бөхийн 2024 оны ДАШТ-ийн тав дахь өдрийн хэсгийн барилдаанууд өнөөдөр 15:50 цагаас эхэлнэ. Өнөөдөр эмэгтэйчүүдийн +78 кг, эрэгтэйчүүдийн -100, +100 кг-ын жингийн барилдаанууд явагдана. ДАШТ-ий эхний өдөр манай жүдочдоос ОУХМ Б.Баасанхүү дэлхийн аварга болж, ОУХМ Г.Наранцэцэг шагналт долдугаар байрт шалгарсан билээ. Харин ДАШТ-ий хоёр дахь өдөр ОУХМ Л.Анхзаяа хүрэл медаль хүртэж, МУГТ Л.Энхрийлэн V байр, М.Ичинхорлоо, Б.Эрхэмбаяр, Б.Эрдэнэбаяр нар шагналт VII байрт шалгарсан. ДАШТ-ий гурав өдөр барилдсан ОУХМ Б.Ганхайч, Г.Болор-Очир, дөрөв дэх өдөр барилдсан Б.Ням-Эрдэнэ, О.Хүслэн, Г.Алтанбагана нар шигшээ наймын барилдаанд шалгарч чадаагүй.

         Өнөөдөр хувийн барилдааны сүүлийн тав дахь өдөр эмэгтэйчүүдийн +78 кг-ын жинд 40 тамирчин барилдана. Тус жинд манай улсаас дэлхийн чансааны 18-д эрэмбэлэгдсэн Ази тивийн аваргын мөнгөн медальт ОУХМ Амарсайханы Адъяасүрэн өрсөлдөнө. Тэрбээр “В” хэсгийн нэгдүгээр тойрогт Японы TOMITA Wakaba-тай таарсан. Хэрэв түүнийг буулган авч чадвал хоёрдугаар тойрогт Португалийн Rochele NUNES-тэй барилдана.

        Харин -100 кг-ын жинд манай улсаас бөх барилдахгүй. Эрэгтэйчүүдийн +100 кг-ын жинд 40 тамирчин барилдах мэдүүлэг өгсөн байна. Тус жинд манай улсаас дэлхийн чансааны 17-д эрэмбэлэгдсэн ОУХМ Одхүүгийн Цэцэнцэнгэл барилдана. Тэрбээр “А” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Германы Losseni KONE-той барилдана.