Монголын фризбигийн холбоо спорт холбоодын нэгдсэн УАШТ-д анх удаа оролцлоо. Тус холбоо олны дунд хамгийн өргөн тархсан ултимейт фризби буюу нисдэг тавагны спортоор бэлтгэл болон үзүүлэх тоглолт хийж, үзэгчдийн дунд нөхөрсөг тэмцээн зохион байгуулсан юм.

        Монголын фризбигийн холбоо 2014 онд байгуулагдсан бөгөөд 10 жилийнхээ ойн дээр Олон улсын фризбигийн холбооны 107 дахь гишүүнээр албан ёсоор бүртгэгджээ. "Фризби бол бүх насныхан хичээллэх боломжтой, сурахад хялбар спорт гэдгээрээ онцлогтой.

        Зарим спортыг сурахад хүндрэлтэй байдаг бол нисдэг таваг сайн шидэж сурахад хагас өдөр л шаардлагатай. Хүүхдүүдийг спортын зөв суурьтай болгоход тусалдаг учраас бид фризбиг хүүхэд, залуусын дунд түгээн дэлгэрүүлэхийг зорьж байгаа.

       Одоо Монголд мэргэжлийн түвшний 30 гаруй, сонирхон хичээллэдэг 100 гаруй хүн байна. Фризби нь дэлхий дахинд хамгийн хурдтай хөгжиж буй таван спортын нэг юм" хэмээн Монголын фризбигийн холбооны үүсгэн байгуулагч Т.Чинтүшиг сонирхуулсан юм.  Сурахад хялбар, ойлгоод үзэхэд сонирхолтой спортын нэгэн төрөл ийнхүү спорт холбоодын нэгдсэн УАШТ нэг хэсэг боллоо.