Холбоодын нэгдсэн УАШТ-2024-ийн нэгэн сонирхолтой төрөл болох виртуал дугуйн УАШТ-ий эхний гараа "Буянт-Ухаа" спорт ордонд болж, дүнгээ гаргалаа. Тэмцээний эхний өдөр тамирчид талын замын 64 км зайд хурд сорьсон бөгөөд тус зам нь "Лондон-2012" олимпын дугуйн тэмцээн явагдсан зам байв.

           Өгсүүр хэсэгт дөрөө нь чангарч, арын салхинд суусан үед дөрөө зөөлрөх зэргээр бодит байдалтай тун ойрхон байдаг нь виртуал дугуйн гол онцлог. Энэ гараанд тамирчид эрэгтэй, эмэгтэй элит, өсвөр үе, мастер, сонирхогч гэсэн найман төрлөөр медальтнуудаа тодруулсан юм.

         Уралдаанд 40 тамирчин хурд сорьсон бөгөөд эрэгтэй элит ангилалд Монголын олон өдрийн тэмцээний аварга, ОУХМ Э.Болор-Эрдэнэ эхнээсээ хошуулчилсаар түрүүлэв. Тэрбээр өнгөрсөн жил виртуал дугуйн анхдугаар УАШТ-д мөн түрүүлсэн билээ.

          Тэмцээний хамгийн ахмад оролцогч 67 настай Г.Дэлгэрсайхан мастерсын 50+ насны ангилалд хүрэл медаль хүртсэн юм. Монголын дугуйн холбооны тэргүүн дэд ерөнхийлөгч, УИХ-ын гишүүн Ц.Мөнхцэцэг эмэгтэй сонирхогчдын ангилалд хурд сорилоо.

          Сонирхуулахад, Олон улсын дугуйн холбоо коронавирусийн хөл хорионы үед анх виртуал дугуйн тэмцээн зохион байгуулсан нь олны сонирхлыг ихэд татаж, үүнээс хойш ийм төрлийн тэмцээн улс орнуудад өргөн тархсан байна. Өнөөдөр тамирчид шандас, тэвчээр шалгасан уулын замын 70 км зайд 17:00 цагаас уралдана.

64 км-ийн дүн

Элит, эрэгтэй:

1.Э.Болор-Эрдэнэ (Team Oggi клуб)

2.Б.Наранхүү (Алдар спорт хороо)

3.Х.Тэмүүлэн (Аттила клуб)

Элит, эмэгтэй:

1.Ц.Солонго (Алдар спорт хороо)

2.Э.Энхмаа (Алдар спорт хороо)

3.Э.Уянга (Номадик клуб)

Өсвөр үе, эрэгтэй:

1.Б.Чинболор (Алдар спорт хороо)

2.А.Дэлгэрсайхан (Алдар спорт хороо)

3.Э.Итгэл (MG Road клуб)

Өсвөр үе, эмэгтэй:

1.Б.Номинжин (Дугуйтай Сэлэнгэ клуб)

Мастер 35-49 нас:

1.Л.Баярцэнгэл (Road Mongolia клуб)

2.Б.Алтан-Оргил (Road Mongolia клуб)

3.Р.Галбадрах (Хурд Эрдэнэт клуб)

Мастер 50+ нас:

1.Д.Энхтөр (Хоршоолол CDM клуб)

2.Д.Энх-Од (Хоршоолол CDM клуб)

3.Г.Дэлгэрсайхан (Road Mongolia клуб)

Сонирхогч, эрэгтэй:

1.А.Даваасүрэн (Road Mongolia клуб)

2.О.Ундрал (Номадик клуб)

Сонирхогч, эмэгтэй:

1.Д.Эрдэнэтуяа (Номадик клуб)