“Улаанбаатарын өвлийн наадам” арга хэмжээг нэгдүгээр сарын 27-28-ны өдөр буюу ирэх амралтын өдрүүдэд “Скай резорт” цанын бааз болон Цонжин болдогт байрлах “Уухайн дуу” жуулчны бааз, Үндэсний цэцэрлэгт хүрээлэнд тус тус болох юм.

         Өвлийн улирлын экстрим спорт, аяллын төрлүүдийг нийслэлчүүддээ таниулах, амралтын өдрүүдийг гэр бүлээрээ аз жаргалтай өнгөрүүлэхэд тус наадмын зорилго оршиж байгааг Нийслэлийн Аялал жуулчлалын газраас мэдээллээ.

      Өвлийн наадмаар Монгол туургатны мөсөн сурын аварга шалгаруулах тэмцээн, сонирхогчийн тэмцээн болно. Мөн мөсний шагайн улсын аварга шалгаруулах тэмцээн, сонирхогчийн тэмцээн, снөүбоардын тэмцээн явагдана.

        Үүнээс гадна параглайдингийн /уулын шүхэр/ хотын аварга шалгаруулах тэмцээн, цасны регбигийн хотын аварга шалгаруулах тэмцээн, мөсөн хананд авиралтын сонирхогчийн тэмцээн, гэр бүлийн буухиа, олс таталтын тэмцээн болох юм. Шүхрийн үзүүлбэр, шувуулахуйн үзүүлбэр, нохой чарганы үйлчилгээ зэргийг үзүүлнэ.

        Улаанбаатар хот болон 21 аймгийн 1000 гаруй тамирчин оролцохоос гадна БНХАУ-ын Өвөр монгол, Шинжаан Уйгур, Тува зэрэг Монгол туургатны 80 гаруй тамирчин “Улаанбаатарын өвлийн наадам”-д оролцохоо илэрхийлжээ.