Хүндийн өргөлтийн УАШТ-ий хоёр дахь өдрийн өрсөлдөөн шинэ дээд амжилтаар дүүрэн эхэллээ. Эрэгтэйчүүдийн 81 кг-ын жинд спортын мастер С.Цэнгүм огцом өргөлтөөр 117 кг-ыг өргөж, залуучууд, насанд хүрэгчдийн улсын рекорд амжилтыг шинэчилсэн байна. Мөн түлхэлттэй өргөлтөөр 142 кг-ыг өргөж, залуучуудын улсын рекордыг шинэчлэв.

      Улмаар нийлбэр дүн 259 кг болсон нь залуучууд, насанд хүрэгчдийн улсын дээд амжилт, рекордоор бүртгэгдлээ. Насанд хүрэгчдийн УАШТ-д анх удаа түрүүлэхдээ дээд амжилтуудыг ээлжлэн тогтоосон С.Цэнгүм өндөр амжилт үзүүлэх ирээдүйтэй тамирчин гэдгээ ийнхүү харуулав.

       Тэрбээр шагналаа гардан авсны дараа "Бэлтгэл дээр маш сайн өргөж байсан болохоор улсын рекорд тогтоох зорилготой орсон. Зорилгодоо хүрсэндээ маш их баяртай байна гэв. Мөн тэрбээр “Би өмнө нь насанд хүрэгчдийн УАШТ-ээс мөнгө, хүрэл медаль авсан ч түрүүлж үзээгүй. Анхны түрүүгээ авахдаа улсын рекорд тогтоосондоо сэтгэл хангалуун байна" хэмээн ярьсан юм.

      Эмэгтэйчүүдийн 71 кг-д Ази тивийн аварга Г.Анужин нийлбэрээр 205 кг-ыг өргөсөн амжилтаар түүртэлгүй түрүүлэв. Тэрбээр өнгөрсөн жил тивийн аварга болохдоо өргөсөн хэмжээнд хүрээгүй ч арын өрсөлдөгчөөсөө 15 кг-аар илүү гарсан юм.

Эрэгтэйчүүдийн 81 кг-ын дүн:

1.С.Цэнгүм (Самбуу сан) 259 кг (117+142 кг)

2.А.Амарсүрэн (Баянгол) 228 кг (102+126 кг)

3.Б.Оргилсайхан (Алдар) 225 кг (100+125 кг)

Эмэгтэйчүүдийн 71 кг-ын дүн:

1.Г.Ануужин (Аврагч) 205 кг (95+110 кг)

2.Б.Хонгорзул (Алдар) 190 кг (84+106 кг)

3.Г.Орхон (Баянгол Ээрмэл) 180 кг (85+95 кг)