Чөлөөт бөхийн УАШТ гурван өдөр үргэлжилж өнөөдөр өндөрлөв. Улсын аваргын сүүлийн өдрийн сүүлийн жингийн барилдааны алтан медалийг Д.Батзул хүртэв. “Хасу мегастарс” клубийн тамирчин Д.Батзул 2020 оны УАШТ-ий 79 кг-д түрүүлж байсан билээ. Үүнээс хойш тогтмол жин өгсөж барилдсан бөгөөд 2022 онд 86 кг-д хүрэл авч, өнгөрсөн жил медалиас мултарсны эцэст энэ жил 92 кг-д түрүүллээ.

         Тэрбээр аваргын төлөөх барилдаанд “Аваргууд академи”-ийн Г.Даянбилэгийг 8:3-аар хожив. Онооны харьцаа 4:3 болж, цаг дуусах дөхсөн үед Г.Даянбилэг улайран дайрч байгаад оноо алдаж, эцсийн найдвараа үгүй хийсэн юм.

      Г.Даянбилэгийн хувьд өнгөрсөн жил хүрэл медаль авсан амжилтаа ахиулж байна. Энэ жингийн хүрэл медалийг “Приус центр”-ийн Б.Нямбаяр, “Ганьт” клубийн А.Мягмарсүрэн нар хүртлээ.