Чөлөөт бөхийн 2024 оны УАШТ-ий эрэгтэйчүүдийн 97 кг-ын финалд өрсөлдөх хоёр бөхийн нэр тодорлоо. Хагас шигшээгийн эхний барилдаанд “U233 хүртэлх насны ДАШТ-ий хүрэл, Азийн наадмын хүрэл медальт Г.Ганхуяг, ДАШТ-ий V байрын шагналт Л.Төртогтохыг 7:0-ээр ялж, финалд шалгарлаа. Тэрбээр өнгөрсөн жил улсын наадмаар харцага цол хүртэж, Азийн наадмаас хүрэл медалиар энгэрээ мялаасан бол шинэ оныг урамтай эхлүүлж, улсын аваргын төлөө өрсөлдөхөөр болов.

          Харин түүнтэй хүч сорих ДАШТ-ний 5-р байр, Ази тивийн аварга шалгаруулах тэмцээний хошой мөнгөн медальт ОУХМ Ө.Батзул, өнгөрсөн жилийн улсын аваргын мөнгөн медальтай Б.Бадамдоржийг цэвэр ялсан юм.Тэрбээр барилдааныг 1:0-ээр хошуучилж явсан ч өрсөлдөгчийнхөө тавхайлдах мэхэнд бүхэл дөрвөн оноо алдсан. Гэхдээ дараа нь ард нь гарч хоёр оноо аван ойртуулж, улмаар үргэлжлүүлэн даралтаар цэвэр ялалт байгуулсан. Өнөөдөр Ө.Батзул, Г.Ганхуяг улсын аваргын төлөө өрсөлдөж, олимпын эрхийн тэмцээнд хэн нь явахаа шийдэх болно.