Хөгжлийн банкны асуудлаар Ерөнхий хяналтын сонсгол хийж байна.

    Энэ үеэр Монгол Улсын Хөгжлийн банкны өнөөгийн байдал, төсөв төлбөрийн явц, үр дүнгийн талаар Хөгжлийн банкны гүйцэтгэх захирал Н.Мандуул танилцууллаа. Тэрбээр “Энэ оны нэгдүгээр сарын 20-нд Хөгжлийн банкнаас мэдээллийн ил, тод байдлын журмаа шинэчлэн, баталсны хүрээнд хэвлэлийн бага хурал хийж, Хөгжлийн банкны чанаргүй зээлийн мэдээллийг олон нийтэд ил болгосон байгаа. Тэгэхээр түүнээс хойш хоёр сарын хугацаанд гаргасан үр дүнгийн талаар танилцуулъя. Хөгжлийн банк төрийн сангийн дөрвөн валютын дансыг Монголбанканд нээсэн. Түүнээс хойш өнөөдрийн байдлаар 132.2 тэрбум төгрөг, 33 зээлдэгчээс эргэн төлөлт хийгдсэн байна. Үүнийг ангиллаар нь задалбал, 22.1 тэрбум хэвийн, 53.5 анхаарал хандуулах, чанаргүйгээс 33, бүрэн төлөгдөж хаагдсан 27.6 тэрбум төгрөгийн зээл байна. Нийтдээ хэвийн зээлнээс есөн зээлийн эргэн төлөлт хийсэн. Анхаарал хандуулах зургаа, чанаргүйгээс 13 зээлдэгчийн зээл төлөлт хийгдсэн. Харин бүрэн төлөгдөж хаагдсан таван зээлдэгч байна” гэв.