Яруу найрагч, зохиолч Ц.Дэлгэрмаа “Зүрхэнд агч намур” яруу найргийн номоороо утга зохиолын оны шилдэг бүтээл шалгаруулах “Алтан өд” наадмын яруу найргийн төрөлд тэргүүн байр эзэллээ. Тэрбээр өмнө нь яруу найргийн төрлөөр “А тэмдэглэл”, “Дотоод тэнгис” номоо хэвлүүлж, уншигчдын хүртээл болгоод байсан билээ. Шинэ "Алтан өдтөн"-ий баярын сэтгэгдлийг уншигч тантай хуваалцъя.

-Оны шилдэг бүтээл шалгаруулах “Алтан өд”-ийн эзэн болсонд баяр хүргэе. Уран бүтээлийг нь шимтэн уншдаг, хүлээдэг уншигчидтайгаа баярын сэтгэгдлээ хуваалцахгүй юу?

     -Баярлалаа. Би энэ жил анх удаа “Алтан өд” наадамд яруу найргийн төрөлд “Зүрхэнд агч намур”, хүүхдийн бэсрэг тууж ”Баавгай нэртэй шувуу, Бархас охин хоёрын түүх" номоороо оролцлоо. Тэр дундаа яруу найргийн номоороо “Алтан өд” наадамд шалгарч, шагналын эзэн болсондоо баяртай байна. “Яруу найраг нэг хавтсанд багтахаар агуулгаараа ямар байх ёстой вэ” гэдгийг бодож л номоо гаргасан. Харин номыг маань үнэлсэн уншигч олонд маш их баярлаж байгаагаа дахин илэрхийлье.

-“Алтан өд” шагналаа гардах мөчид танд ямар мэдрэмж төрсөн бэ?

     -Шагнал гардах мөчид маш их баярлаж, тулгамдсан. Би утга зохиол, яруу найргийнхны нэгэн үеийн төлөөлөл шүү дээ. Тэгэхээр намайг үргэлж дэмждэг найз нөхөд, ажлын хамт олон,  шүлэгт минь дуртай уншигчид, гэр бүлийнхэн, тэнгэрт одсон аав болон эрхэм хүмүүсийнхээ өмнөөс баярлаж байна. Би “2022 онд бичгийн ажлаа сайн хийе” гэж бодсон. Тэгээд зорилт тавьсан оныхоо эхэнд шагнуулсан болохоор урамтай сайхан байна.

- “Зүрхэнд агч намур” номын нэр ямар учиртай вэ?

     - “Өөрөө өөртөө гэрэл” бол, “Зовж байгаа бол шалтгааныг нь өөрөөсөө хайж, өөрөө шийдлээ ол” гэдэг шиг ухаарлыг өөрөө хай гэх агуулгатай нэр.  “Намур” гэдэг нь би өөрөө ч юм шиг. Намрын улиралд жимс, ногоо бүрэн боловсордог шиг би өөрийнхөө хэмжээнд үе шаттайгаар боловсорч байгаа. Бас намрын улиралд дуртай болохоор өөрийгөө намартай зүйрлэж, номынхоо нэрийг “Зүрхэнд агч намур” гэж нэрлэсэн.