Тайланд Улсад зохион байгуулагдсан “Miss Grand International” тэмцээнд Мьянмарыг төлөөлөн оролцсон мисс Хан Лай тайзан дээр “Биднийг авраач” хэмээн өөрийн дуу хоолойгоо өргөсөн билээ.

Сарын өмнө Мьянмарын цэргийнхний эсрэг жагсаж байсан 22 настай Хан Лай өөрийн боломжоо ашиглан олон улсад дуу хоолойгоо өргөсөн нь тэр юм.  Одоогоор Мьянмарын жагсаалд 500 гаруй хүн амиа алдаад байгаа билээ.

Тэрбээр “Мьянмарт сэтгүүлчдийг цагдан хорьсон учир би дуу хоолойгоо өргөхөөр шийдсэн” хэмээн BBC агентлагт ярилцлага өгсөн байна. Ийнхүү хоёрхон минут ярихдаа Мьянмар Улсын Аюулгүй байдлынхан радараар сонсож байх вий хэмээн эмээж байсан гэв.

Учир нь Хан Лай “Би Мьянмарын нөхцөл байдал, гэр бүлийнхэндээ маш их санаа зовж байна. Манай найзууд гэр рүүгээ битгий ир гэж хэлсэн. Тэдний айж буй нь үндэслэлгүй биш юм. Аюулгүй байдлынхан өнгөрсөн долоо хоногт 18 алдартан, нөлөө бүхий хоёр сэтгүүлчийг үүргээ үл тоомсорлосон хэмээн баривчиллаа. Надтай цэргийн хүчнийхэн холбоо бариагүй ч нийтийн сүлжээгээр маш их заналхийлсэн захидал ирлээ. “Эх орондоо ирэхэд чинь шорон хүлээж байна” гэж хүртэл заналхийлсэн” хэмээн ярьжээ.

Хан Лайгийн аюулгүй байдлын үүднээс Тайландын нийслэл Бангкок хотод хэсэг хугацаанд байрлахаар шийдсэн байна.