"Мьянмарын жагсаалд аюулгүй байдлын албаныхны бууны суманд долоо настай охин өртөж, жагсаалд амиа алдсан хамгийн залуу хохирогч боллоо. Охиныг гэрт нь байхад буудсан байна" хэмээн хэвлэлийнхэн мэдээлжээ. 

"Цэргийнхэн аав руу нь буудсан боловч бууны сум охиныг оножээ. Мөн түүний 19 настай ахыг нь цэргийнхэн баривчилсан бөгөөд энэ талаар албаныхан тайлбар өгөөгүй байна" хэмээн орон нутгийн хэвлэл мэдээлэв.

Мьянмар Улсад өнгөрсөн хоёрдугаар сарын 1-ний өдөр цэргийн хүчнийхэн төрийн эргэлт хийж, Улс төрийн эрх мэдэлтнүүдийг шоронд хорьсон явдалд иргэд эсэргүүцлээ илэрхийлэн жагссаар байгаа билээ. Хүүхдийн эрхийн байгууллага “Уг жагсаалд амиа алдсан олон арван хүний 20 гаруй нь насанд хүрээгүй хүүхэд байна” хэмээв . Эсэргүүцлийн жагсаалд 164 хүн амиа алдсан хэмээн мэдээлж буй ч хараат бус нийгэмлэгийн судалгаагаар дор хаяж 264 амиа алдсан гэжээ.

Цэргийн хүчнийхний энэхүү явдалд “Жагсаалд амиа алдсан хүмүүст харамсаж байгаа ч жагсагчид Мьянмар улсад анархизм авчирсан. Жагсагчид хүчирхийлэл ашиглаж байна”. хэмээн буруутгасан байна.