АНУ-ын Ерөнхийлөгч Жо Байден Владимир Путинийг “алуурчин” хэмээн тодорхойлсны дараа Путин түүнийг цахимаар ярилцахыг урьжээ.

ОХУ-ын Ерөнхийлөгч Владимир Путин ойрын өдрүүдэд “шууд нэвтрүүлэг” эсвэл “онлайн” хэлэлцүүлэг зохион байгуулна гэв.

Владимир Путин “Би Ерөнхийлөгч Жо Байдентай яриагаа үргэлжлүүлмээр байна. Гэхдээ энэ удаа олон нийтэд нээлттэй байдлаар явуулна” хэмээн баасан эсвэл даваа гарагт ярилцах санал тавьсан байна.

Өнгөрсөн лхагва гарагт АBC агентлагийн сэтгүүлч Жо Байденаас “ОХУ-ын сөрөг хүчний удирдагч Алексей Навальныйг хордуулсны төлөө та Владимир Путинийг “алуурчин” гэж бодож байна уу” гэсэн асуултад “Тийм” хэмээн хариулсан билээ. Энэхүү хариулт нь хоёр улсын дунд хурцадмал байдлыг үүсгэж, ОХУ Вашингтон дахь элчин сайдаа татан авсан нь түүхэнд байгаагүй үйл явдал болжээ.