Рок хөгжмийн домог болсон “Oasis” хамтлаг 15 жилийн дараа эргэн нэгдэж, Их Британи, Ирланд даяар 17 тоглолтоо хийх тухайгаа мэдэгдээд буй. Тэгвэл домогт хамтлагийн эргэн ирж буй 17 тоглолтын тасалбар ердөө 10 цагийн дотор зарагдаж дуусжээ.

Тухайлбал, “Oasis” хамтлагийн тоглолтын тасалбарын үнэ 75-500 фунт стерлинг буюу 100-650 ам.долларын үнэтэй бөгөөд тасалбарын худалдаа орон нутгийн цагаар бямба гарагийн өглөөний 09:00 цагт эхэлж, 19:00 цаг гэхэд бүх тасалбар нь борлуулагдаж дууссан байна.

Ташрамд дурдахад, “Oasis” хамтлаг эргэн нэгдэж буйгаа наймдугаар сарын 27-ны өдөр зарласан. Хамтлагийг үүсгэн байгуулагчид болох ах дүү Лиам, Ноэл Галлахер нар эхлээд 2025 оны долдугаар сарын 4-нөөс наймдугаар сарын 17-ны хооронд Кардифф, Манчестер, Лондон, Эдинбург, Дублин хотуудад 14 тоглолт хийнэ гэж анх мэдээлж байсан боловч тасалбарын борлуулалттай холбоотойгоор Манчестер, Лондон, Эдинбург хотод гурван нэмэлт тоглолт хийхээр болсон билээ.