Грек Улсад Афин-Селаник чиглэлийн хурдны галт тэрэг Селаник-Лариса чиглэлийн ачаа тээврийн галт тэрэгтэй мөргөлдсөн осол өчигдөр болсон. Ослын улмаас 36 хүн амиа алдаад байгаа бөгөөд 85 хүн бэртэж, 194 хүнийг эмнэлгийн байгууллагад хүргэж, тусламж үзүүлжээ. Тэгвэл үүссэн нөхцөл байдалтай холбоотойгоор Грек Улсын Зам, тээврийн сайд Караманлис өөрийн хүсэлтээр огцорсон байна. Огцорч буй тухайгаа тэрбээр “Амиа алдагсдын төлөө хийж чадах өчүүхэн зүйл минь” хэмээжээ.

                                Албаны мэдээллээр осолд орсон зорчигч тээврийн галт тэргэнд байсан иргэдийг Селаник хотын эмнэлэгт хүргээд байгаа аж. Тэгвэл осол болсон Тэссали мужийн захирагч Константинос Агоратос “Галт тэрэгний осол маш их хэмжээний хохирол учруулсан. Зорчигч тээврийн дөрвөн вагон замаас гарсан” гэжээ. Харин ослын шалтгааны талаар нэрээ нууцалсан Грекийн төмөр замын дохио, мэдээллийн ажилтан “Галт тэрэгний техникийн асуудлаас үүдсэн” хэмээсэн байна.

Осол болсон газарт ажиллаж буй орон нутгийн Онцгой байдлын газрын ажилтан “Аврагчид шөнийн цагаар бүтэн ажиллаж, иргэдийг гарган авсан. Би өмнө нь хэзээ ч энэ төрлийн осол харж байгаагүй” гэжээ.

Д.ЭНХБИЛГҮҮН