“Дисней” компанийн гүйцэтгэх захирал Боб Игер компаниа шинэчилж байгаа ажлынхаа хүрээнд 7000 ажилтнаа цомхотгосон талаар мэдэгдэв. Тус компанийн гаргасан “Disney+” стириминг үйлчилгээ 2019 онд ашиглалтад орсноосоо анх анх удаа захиалагчдын тоо нь буурсан цаг үетэй нүүр тулж байгаа. Тэгвэл “Дисней” компани “Disney+” стириминг үйлчилгээг илүү ашигтай болгох төлөвлөгөөний дагуу 7000 ажилтнаа цомхотгосон нь компанийнхаа зардлаас 5.5 тэрбум ам.доллар хэмнэх гэнэ.

                                           Энэ талаар тус компанийн гүйцэтгэх захирал Боб Игер “Бид хэрэгжүүлж буй төлөвлөгөө нь компанийн зардлаа бууруулахын зэрэгцээ стриминг бизнесийн тогтвортой өсөлт, ашигтай ажиллагааг бий болгож, ирээдүйд учирч болзошгүй хямрал, эдийн засгийн сорилтыг даван туулах байр суурь, үнэ цэнийг бий болгоно гэдэгт итгэж байна” хэмээжээ.

“Дисней” компанийн орлого 2022 оны сүүлийн улиралд найман хувиар өсөж, 23.5 тэрбум ам.доллар болсон ч 2023 оны эхний улиралд “Disney+” стириминг үйлчилгээний захиалагчдын тоо огцом унажээ. Тус компани 7000 ажилтнаа цомхотгосон нь дэлхийн хэмжээнд нийт ажилтных нь 3.6 хувь аж.