Монгол Улсын Ерөнхий сайд Л.Оюун-Эрдэнэ “Чингис хаан" олон улсын нисэх буудлын үйл ажиллагаатай танилцаж байна

Тэрбээр сэтгүүлчдийн асуултад хариулах үеэрээ С.Зориг агсны амь насыг хөнөөсөн хэрэгт буруутгагдсан Т.Чимгээтэй биечлэн уулзана гэдгээ илэрхийлсэн юм. Энэ дагуу Ерөнхий сайд Л.Оюун-Эрдэнэ гуравдугаар сарын 8 буюу Олон улсын эмэгтэйчүүдийн эрхийг хамгаалах өдөр өөрийн биеэр очиж уулзана.

Тэрбээр “Шүүх гэм буруутайг тогтоодог тул өмнөөс нь дүгнэлт хийх боломжгүй.  Засгийн газрын тэргүүний хувьд би Жендэрийн үндэсний хорооны хурал дээр эрүүдэн шүүлттэй холбоотой зарим нэг субъектүүдийн асуудалтай холбоотойгоор нэг зүйлийг амласан. Шүүн таслах үйл ажиллагаа хийгдэх, хэрэг бүртгэлтийн үйл ажиллагаа явж байх үед аймшигтай зүйл болдог нь ил болсон. Та бүхэнд үзүүлсэн бичлэг бол зөвхөн нэг хэсэг нь. Мансууруулах бодис судсаар нь хийж, хувцсыг нь тайлаад, бичлэг хийгээд нөхөр рүү нь явуулсан асуудал хүртэл гарсан. Энэ бүхнийг олон нийтэд ил болгож, тухайн үед ярьж чадаагүй.

Жендэрийн үндэсний хороон дээр эмэгтэй гишүүд энэ асуудлыг хөндөж тавьсан. Тиймээс гуравдугаар сарын 8-ны өдөр энэ агуулгаар Т.Чимгээтэй миний бие очиж уулзана. Төв аймагт байдаг ашигладаггүй тусгай хорих ангийг тохижуулсан. Тэр хорих анги дээр гуравдугаар сарын 8-ны өдөр мөн очно. Хорих ангийн доод давхарт буюу эрүү шүүлт хийсэн газарт нь очино. Тус хорих ангийг дахиж ашиглахгүйгээр хаана. Үүнтэй холбоотой мөрдөн шалгах үйл ажиллагаан дээр гацсан байгаа зарим нэг асуудлууд дээр Засгийн газар онцгой анхаарч ажиллана” гэсэн юм.