Сонгинохайрхан дүүргийн Татварын хэлтсийн ажилтан Э гэх эмэгтэйг албан тушаал, эрх мэдлээ ашиглаж, бусдаас их хэмжээний авлига авсан байж болзошгүй хэмээн хууль хяналтын байгууллагаас шалгаж, 48 цагийн хугацаатай саатуулсан талаар бид өмнө нь мэдээлсэн билээ. Тодруулбал, АТГ-аас гуравдугаар сарын 9-нд тус дүүргийн Татварын хэлтсийн байцаагч Э-ийн албан өрөө болон гэрт нь нэгжлэг хийж, эд мөрийн баримтаар их хэмжээний бэлэн мөнгө хурааж авсан гэх.

      Эх сурвалжийн мэдээлснээр “Татварын байцаагч Э-г БНХАУ-ын хөрөнгө оруулалттай “Шинжиан шинфа” ХХК-ийн удирдлагуудтай үгсэн тохиролцож, тус компанийн татварыг нуун далдахад туслалцаа үзүүлж, 100-150 сая төгрөгийн авлига авсан гэх үндэслэлээр саатуулсан. Э нь Хөвсгөл аймгийн харьяат, тус хэлтэст олон жил ажиллаж байгаа, туршлагатай байцаагч. Уг авлигын хэрэг нь ганцхан “Шинжиан шинфа” ХХК-аар ч тогтохгүй байж мэдэх нөхцөл байдал бий болсон гэнэ” гэсэн билээ.

            Харин бид Сонгинохайрхан дүүргийн Татварын хэлтсийн дарга Д.Базартай холбогдож, байцаагч Э-гийн талаар тодрууллаа. Тэрбээр “Шинжиан шинфа” ХХК-аас авлига авч, татварыг нь нуун далдалсан гэх татварын байцаагч Э-г ажлаас нь чөлөөлсөн. Өөрөөр нь өргөдөл бичүүлж, ТеГ руу хүсэлт явуулж, шалгагдаж дуусах хүртэл нь үүрэгт ажлаас нь чөлөөлж, хариуцлага тооцсон. Хууль хяналтын байгууллагаас энэ хэргийг шалгаж байгаа. АТГ-аас гаргаж байгаа зөвлөмж бүрийг байцаагч нартаа танилцуулж, албан сургалтад цаг хугацаанд нь хамруулдаг байсан. Байцаагч Э-гээс өөр энэ хэрэгт холбогдсон хүн байхгүй. Тухайн хүн ь ганцаараа, “Би авсан” гэж хэлсэн байна лээ” гэв.

            Ташрамд дурдахад, “Шинжиан шинфа” ХХК нь Төрийн банкнаас 2017 оны Ерөнхийлөгчийн сонгуулийн өмнө 20 тэрбум буюу өндөр үнэтэй зээлийг хууль бусаар гаргуулж авсан. Зээлийн эргэн төлөлт заасан хугацаанд хийгдээгүй тул тус компанийн удирдлагуудад шүүхээс ял оноосон байдаг. Тодруулбал, Чингэлтэй дүүргийн Эрүүгийн хэргийн анхан шатны шүүхээс “Шинжиан Шинфа” ХХК-ийг Төрийн банкинд их хэмжээний хохирол учруулсан хэмээн үзэж, “Шинжиан Шинфа” ХХК-ийн хувьцаа эзэмшигч БНХАУ-ын иргэн Сун Гуан Чуанд хоёр жилийн хорих ял, тус компанийн гүйцэтгэх захирал Ц.Энхтунгалагт 1.6 жилийн хорих ял оноосон юм. Мөн “Шинжиан Шинфа” компаниас 20 тэрбум төгрөгийн хохирлыг гаргаж, Төрийн банканд төлүүлэх шийдвэр гарсан байдаг.

Мөн “Шинжиан шинфа” компанийн удирдлагууд нь 2021 онд Монголын улстөрчид дарамтлуулж, зодуулж, сүрдүүлэгт өртөж, концесс эзэмших эрхээсээ татгалзаж, гарын үсэг зурсан хэмээн хууль хяналтын байгууллагад хандаж, уг хэрэг өдгөө прокурорт шалгагдаж байгаа билээ.