Афганистанд энхийг сахиулах ажиллагаанд оролцсон 119 алба хаагч энэ сарын 10-нд эх орондоо ирсэн талаар УОК-ын Шуурхай штабын дарга Б.Ууганбаяр хэлсэн. Тэрбээр “Энхийг сахиулагчдыг “Бага баян” энхийн төлөө цогцолборт тусгаарласан” гэсэн юм. Тусгаарлалтын хугацаа 14 хоног бөгөөд энхийг сахиулагчид маргааш тусгаарлалтаас гарна. Тэгвэл тэдний нэг буюу Ерөнхий сайд асан У.Хүрэлсүхийн ахлах зөвлөх Ж.Энхбаярын дунд хүү Э.Мөнхтөрийг тусгаарлалтын хугацаа дуусахаас өмнө энэ сарын 21-нд автомашинаар авахуулсан гэх мэдээлэл гарч, олон нийтийн дунд бухимдал үүсгээд байгаа. Учир нь энгийн иргэд 14 хоногийн тусгаарлалтыг журмын дагуу мөрдөж байгаа бол эрх бүхий албан тушаалтны хүү хугацаанаасаа өмнө тусгаарлах байрнаас гарсан гэх мэдээлэл шүүмжлэл дагуулж буй.

Афганистанаас энэ сарын 10-нд ирсэн 119 энхийг сахиулагчийг Улаанбаатарт зочид буудал руу шилжүүлсэн. Харин тусгаарлалтын хугацаанаас өмнө гарсан гээд байгаа алба хаагч энэ сарын 7-нд буюу эхний ээлжинд ирсэн 40 алба хаагчийн нэг.

Энэ талаар УОК-ын Шуурхай штабын дарга Б.Ууганбаяраас тодруулахад “Афганистанаас энэ сарын 10-нд ирсэн 119 энхийг сахиулагчийг Улаанбаатарт зочид буудал руу шилжүүлсэн. Харин тусгаарлалтын хугацаанаас өмнө гарсан гээд байгаа алба хаагч энэ сарын 7-нд буюу эхний ээлжинд ирсэн 40 алба хаагчийн нэг. Тэд “Бага баян” цогцолборт тусгаарлагдаж, энэ сарын 21-нд гарцгаасан. Өөрөөр хэлбэл, тусгаарлалтын хугацаа нь дуусаад гарсан хүмүүс. Харин Э.Мөнхтөр нь Ерөнхий сайд асан У.Хүрэлсүхийн ахлах зөвлөх Ж.Энхбаярын хүү эсэхийг мэдэхгүй” гэв.