Ирланд Улсын нийслэл Дублин хотод Монгол Улсын иргэн Ц.Уранцэцэг бусдын гарт амиа алдсан харамсалтай хэрэг гарсан байдаг. Тэгвэл талийгаачийн амийг хөнөөсөн 16 настай ирланд хүүд холбогдох хоёр дахь шүүх хурал өнөөдөр болох гэж байна.

Хэргийг эргэн сануулбал, 2021 оны нэгдүгээр сарын 20-ны оройн 21:30 цаг орчимд талийгаач Ц.Уранцэцэгийг Дублин хотын IFSC дахь гудамжинд явж байхад нь дээрэмдэж, хүзүү тус газар нь хутгалсан. Талийгаачийг хэрэг гарсан газрын ойролцоо орших “Матер” эмнэлэгт хүргэсэн ч шархаа даалгүй амиа алдсан юм. Хэрэг гарсан өдөр сэжигтэн хүүг баривчлахдаа сэтгэцийн өвчтэй байж болзошгүй гэж дүгнэн сэтгэцийн эмнэлэгт хүргэсэн байдаг. Хэрэг гарах үед сэжигтэн этгээд нь 14 настай байсан бөгөөд мэдүүлэг өгөхдөө “Хэрэг хийгээгүй” гэж мэдэгдэж байсан ч өнгөрсөн онд санаатайгаар хөнөөсөн тухайгаа хэлж, хэргээ хүлээсэн байдаг.

                               16 настай ирланд хүүд холбогдох эхний шүүх хурал Ирландын Эрүүгийн хэргийн төв шүүхэд болсон бөгөөд шүүх хуралдаанаар хүүг өмнө нь хулгай, хүчирхийлэл, хар тамхи хэргээр 31 ял, шийтгэл хүлээж байсныг мэдэгдсэн. Мөн сэжигтэн хүү хэрэг гардаг өдөр өөр нэгэн эмэгтэйн гар утсыг булаахыг завдсан, хэрэг гарахаас хэдэн өдрийн өмнө дэлгүүр дээрэмдсэн, бусдын унадаг дугуйг хулгайлсан болохыг тогтоожээ. Ирландын Эрүүгийн хэргийн төв шүүхэд болсон эхний шүүх хуралд сэжигтэн хүүгийн эмээ гэрчээр оролцож “Ач хүү маань багаасаа хөдөлгөөтэй, спортоор хичээллэдэг, бокс тоглодог байсан. Гэсэн ч төрсөн ээжтэйгээ уулзсаны дараа өөрчлөгдөж, сургууль дээрээ ч асуудалтай байх болсон. Шинэ найзуудтай болж тэдэнтэйгээ хамт дугуй хулгайлж, хар тамхи худалдан авахыг оролдож байсан нь үнэн. Хэрэг гарснаас хойш шөнөжин уйлах нь сонсогддог. Бүр гурван удаа амиа хорлохыг оролдсон” гэжээ.

                               Шүүх хуралдаанаар өмгөөлөгч Майкл О’Хиггинс сэжигтэн хүүгийн хэргийг урьдчилан төлөвлөөгүй оппортунист гэмт үйлдэл гэж үзсэн. Мөн хэрэг гардаг өдөр сэжигтэн их хэмжээний хар тамхи хэрэглэсэн байсанд үндэслэн ялын дээд хэмжээ өгөхийг хүссэн. Харин тус хурлыг шүүн явуулсан шүүгч Тони Хант сэжигтнийг нас биед хүрээгүйг шалтгаалан шүүх шийдвэрийг 2023 оны нэгдүгээр сарын 16-н хүртэл хойшлуулж, сэжигтэнг баривчлах шийдвэр гаргасан юм.