УИХ-ын чуулганы өнөөдрийн нэгдсэн хуралдааны үеэр Байгаль орчин, хүнс, хөдөө аж ахуйн Байнгын хорооны дарга Х.Болорчулуун “УИХ чадан ядан ажиллаж Монголоо тэжээж байгаа. Хямдхан мах, 1000 гаруй төгрөгийн үнэтэй талх, гурил идэж байгаа улс манайхаас өөр байхгүй шүү. Үүнийг би 100 баталгаатай хэлж чадна. Бид хөдөө аж, ахуйн салбараа улам сайн дэмжих ёстой. Тэгж байж хөдөө аж ахуйд суурилсан хүнсний үйлдвэр хөгжинө. Мөн үйлдвэрлэлээ тарифын бодлогоор дэмжих нь зүйтэй” гэж хэлэв. Байгаль орчин, хүнс, хөдөө аж ахуйн Байнгын хорооны дарга Х.Болорчулууны тайлбарлаж байгаагаар “1000 төгрөгийн үнэтэй талх, гурил идэж байгаа улс манайхаас өөр байхгүй” гэнэ. Тэгвэл 1000 төгрөгөөс доош үнээр талхаа худалдаалдаг таван оронтой танилцана уу.

            Серби Улсын “Numbeo” судалгаа, мэдээллийн сайтад 2022 онд олон улсад өргөн хэрэглээний бараа бүтээгдэхүүний үнэ ямар байгаа талаар статистик мэдээлэл байршуулжээ. Тус мэдээлэлд өгүүлснээр Монгол мөнгөөр 1000 төгрөгөөс доош үнээр талхаа зардаг таван улс байна.

Узбекистан Улс нэг ширхэг талхыг Монгол мөнгөөр 910.80 төгрөг, Казахстан 903.38 төгрөг, Шри Ланка 863.92 төгрөгөөр худалддаг юм байна. Тэгвэл Алжир, Тунис Улсад хамгийн хямд буюу Алжирт 464.11 төгрөг, Тунист 408.59 төгрөгийн үнэтэй борлуулдаг аж. Харин Монгол Улстай ижил үнээр талхаа худалддаг хоёр орон байгаа нь Молдав 1035.82 төгрөг, Азербайжан 1004.95 төгрөг байна.