Эрх чөлөө, өөр өнгө, ондоо ертөнц гэх үгс түүнийг илэрхийлэх болов уу. Өөртөө бүтээсэн ийм нэг оршихуйнхаа хаалгыг тэр анх “Авьяаслаг монголчууд”шоунд орсноор олны өмнө нээсэн. Даруухан, зөөлөн дуутай охин тайзнаа гарахаас өмнө хөтлөгчид яриа өгч байв. Тэгэхэд хэн ч нэг их анзаараагүй. Тайзнаа гараад гартаа барьсан жижигхэн үкүлэлэ хөгжмөө тоглон, нүдээ анин чин сэтгэлээсээ дуулахад нь сая нэг “Энэ чинь хэн бэ, ёстой гоё хоолойтой охин байна даа” гэж олзуурхсан.

        Харин дуугаа дуулж дуусахад шүүгч нарын асуултад хариулж зогсоо охин бол хэрсүү, зоримог, өөрийгөө сорьж яваа Б.Ихэрсувд байв. “Дуу хөгжим чиний хувьд юу вэ” гэх хийлч Ч.Дэлгэрцэцэг шүүгчийн асуултад “Мэдрэмжээ гаргах зүйл. Хөгжим тоглохоор би өөрийнхөөрөө байж чаддаг” гэсэн хариулт нь одоо ч түүнээс харагддаг, мэдрэгддэг. Энэ бол Ихэрээгийн эхлэл бас эрэл. Шат ахих тусам тэр өөрийгөө уудалж, сонсож, ажилласаар байсныг сонирхолтой үзүүлбэр, содон имиж нь илтгэж байсан.Бүр сүүлдээ түүнээс ямар тоглолт, дуулалт гарах бол гэж хүлээдэг болсон. Үүнээс өмнө тэр хаана байсан бол гэж үү.

          "Voice"-д тэр Ука дуучны багийг сонгож, өмнөх өөрийгөө бүр л өндөр түвшинд аваачихаар сонирхолтой, содон үзүүлбэрийг үзүүлж байсан. Богино үс, урт оймс, хатны дээлний загвартай монгол хувцас гээд өөртөө тохирсон, өөрчлөлт дүүрэн имиж нь үзэгчдийн харааг булааж байв. Бүр ч нээлттэй, задгай, өөрийгөө бүрэн дүүрэн эвдсэн уран бүтээлч энэ шоугаар үзэгчдийн өмнө эргэн ирж байв.

              Б.Ихэрсувдын дуунууд сонсогчдод эрх чөлөө бэлэглэдэг. Тэр дуу бүхэндээ тодорхой дүрд хувирч, эмоци, имижээрээ мэдрэмжээ илэрхийлж, түүндээ үзэгчдийг урин дууддаг. Өвөрмөц хоолой, этгээд имиж, эрж хайсан өнцгөөрөө тэр ондоо нэг ертөнцийг бүтээлдээ бий болгож, түүний дууг сонсож, клипийг нь үзсэн хэн бүхэн гарцаагүй өөр мэдрэмж авдаг. Дуулаад эхлэхээрээ тэр юу ч хийхэд бэлэн зэвүүн зоригтой охин болчихсон байдаг. Үүнийг “Get up”, “Good Witches”, “Arai Arai”, “Chemistry” зэрэг олон уран бүтээлээс нь мэдэх билээ. Түүнийг дууг сонсоход нэг тийм хүлээснээс тайлагдсан мэт болж эрч хүчээр цэнэглэгддэг. Тэр ийм уран бүтээлийн эзэн. Өөрөө ч тэр  дуу хөгжмөөрөө өөр ахуйд хүрдгээ ярьсан байдаг. Дуу л түүнд жигүүр ургуулж, жирийн биш болгож, дуу л түүнийг өөр ертөнцөд хүргэдэг байна. Түүний ертөнцөд чихэвчээ зүүгээд нүдээ анин зочлоорой. Гарцаагүй өөр оршихуйд хүрч, Ихэрээтэй хамт цаг хугацаа, мөрөөдлийн чөлөөгөөр аялж, анги ондоо сэргэг сэнгэсэн мэдрэмж авах вий.