Livetv.mn телевизийн сэтгүүлч С.Будрагчааг албадан баривчилсан мэдээлэл гараад байна. Тодруулбал, түүнийг Эрүүгийн цагдаагийн албаны мөрдөн байцаагч, ахмад н.Энх-Амгалан үг хэлгүйгээр баривчилж, хүчээр машинд суулган явжээ.

            Энэ талаар Эрүүгийн цагдаагийн албаны мөрдөн байцаагч, ахмад н.Энх-Амгалантай холбогдож тодруулахад “Бид С.Будрагчаа сэтгүүлчээс мэдүүлэг авсан. Өөртэй нь тохиролцож, ойлголцсон тул автомашинд суулган явсан. Мэдээлэл тавьсан хүн нь худлаа бичсэн байна лээ. С.Будрагчаа мэдүүлгээ өгчихөөд ажил руугаа явсан” гэв.

Харин энэ асуудлаар Livetv.mn телевизийн сэтгүүлч С.Будрагчаатай холбогдоход “Би цагаан сарын өмнө “Монголын өмгөөлөгчдийн холбооны удирдлагууд өмгөөлөгч нараа дарамталсан” гэж мэдээ бичсэн юм. Эрүүгийн цагдаагийн албаны мөрдөн байцаагч н.Энх-Амгалан гэх алба хаагч над руу залгаж, “Таниас хоёр асуулт асууя. Хаана байгаа газар чинь яваад очъё" гэсэн юм. Би “Ажил дээрээ байна” гэж хэлсэн. 30 орчим минутын дараа энгийн хувцастай, 23-25 орчим насны залуу хүрч ирсэн. Тэр хүн “Хоёулаа машинд уулзъя” гэж хэлээд ямар нэгэн лого тэмдэггүй саарал өнгийн “Рrius20” маркийн машинд суулгасан. Надад юу ч хэлэлгүйгээр шууд хөдлөөд явсан. Монголын өмгөөлөгчдийн холбооны ерөнхийлөгчийн гаргасан гомдлын дагуу гэрчээр мэдүүлэг авахын тулд л цагдаа нар ийм үйлдэл хийжээ. Би яг одоо ЭЦГ-ын гадна талд мэдүүлэг өгөх гээд хүлээж сууна” гэв.