Монгол Улсын Ерөнхийлөгчийн зөвлөх болон МАН-ын удирдах албан тушаалтнууд иргэдийнхээ сонгох эрхийг хууль бусаар авсныг нотлох баримтаар дэлгэж, шүгэл үлээсэн Г.Ган-Очирыг улс даяар эрэн сурвалжилж байна. Тэрбээр тавдугаар сарын 20-нд тус баримтыг ярих үеэрээ "Сонгуулийн цахим машин 2012 онд монголд зургаан жилийн лицензтэй орж ирсэн. Харин 2018 онд лицензийн хугацаа дуусаж, Мөөгий, Мөнхбат гэх хоёр залуу программ суулгаж өгсөн.

    Тэд сонгуулийн хар машинд хүссэнээрээ өөрчилж болох программ хийж өгсөн. Ингэснээр хүссэн нэр дэвшигчийг ялах боломжтой болгосон гэсэн үг. Үндсэн программ нь маш сайн нууцлалтай байсан. 2017 оны Ерөнхийлөгчийн сонгуулиар Төв аймгийн 88 дугаар хэсгийн хороо дээр сонгуулийн цахим машин гацсаны улмаас гараар тоолсон. Машин яагаад гацсан бэ гэхээр өмнөх программ нь сонгуулийн санал өгөх цаасан дээр цахим кодыг буруу, далий хэвлэсэн тохиолдолд уншдаггүй байсан. Харин сүүлд өөрчилсөн программтай хар машинд ямар ч цаасыг уншдаг болсон” гэж мэдэгдсэн юм. Тэгвэл Г.Ган-Очир нь уг мэдэгдэл хийснийхээ дараа учир битүүлгээр алга болсон тул Цагдаагийн ерөнхий газраас эрэн сурвалжилж байна.