Монгол-Оросын хамтарсан гуравдугаар сургуулийн үйлчлэгч М Улсын гуравдугаар төв эмнэлгийн эрчим эмчилгээний тасагт хэвтэн эмчлүүлж байна. Түүний биеийн байдал хүнд, сэхээний тасагт хэвтэж, охин нь сахиж байгаа юм.

        Тэгвэл үйлчлэгч эмэгтэйг Монгол-Оросын хамтарсан гуравдугаар сургуулийн захирал Ж.Соронзон зодож, биед нь хүнд гэмтэл учруулсан гэх мэдээлэл бий. Тодруулбал, өчигдөр 12:00 цагийн үед 55 настай сургуулийн үйлчилгээний ажилтан М гэх эмэгтэйг Ж.Соронзон захирал зодсон гэх. Сэхээний тасагт эмчлүүлж байгаа үйлчлэгч эмэгтэй хэлэхдээ “Би Ж.Соронзон захиралд зодуулчихлаа” хэмээн ярьж, улмаар орой нь ухаан алдаж, эмнэлэгт хүргэгдсэн талаар зарим хэвлэл мэдээлээд байна.

       Бид энэ талаар Монгол-Оросын хамтарсан гуравдугаар сургуулийн Ж.Соронзонтой холбогдож, тодрууллаа. Тэрбээр “Би үйлчлэгч эмэгтэйг зодоогүй. Тэр хүнтэй өчигдөр уулзаагүй, таараагүй. Манай сургуулийн ямар ч үйлчлэгч зодуулаагүй, гэмтээгүй. Эмнэлэгт хэвтэн эмчлүүлж байгаа үйлчлэгч эмэгтэй өчигдөр өглөө ажилдаа ирсэн. Ажлаа хэвийн хийж байгаад эмчээс, “Банк яваад ирье” чөлөө авсан юм билээ. Тэгээд банк руу явж байгаад гудамжинд ухаан алдаж унасан байсан. Гуравдугаар төв эмнэлгээс бидэн рүү холбогдож, хэрэгтэй зүйлсийг нь авчирч, ар гэрийнхнийг нь дууд гэж хэлсэн. Бид эмнэлэгт хэрэг болох юмыг нь хүргэж өгөөд, охиныг нь дуудсан. Охин нь сахиж, үйлчлэгч эмэгтэй сэхээний тасагт эмчлүүлж байна. Намайг гүтгэж, буруу мэдээлэл өгч байгаа хүмүүсийг цагдаад өгч байгаа. Энэ хэргийг шалгаж тогтоох биз.

Бие нь муу байгаа үйлчлэгч манай сургуульд олон жил ажилласан. Манай сургуулийн сайн ажилтан. Тэтгэвэрт гарах нас нь болж, шаардлагатай бичиг баримтаа бүрдүүлэхээр банк явсан юм билээ. Харамсалтай нь, бие нь өвдөж, гудамжинд ухаан алдаж унасан гэсэн. Өчигдөр хамт байсан ажилтнууд цагдаад мэдүүлэг өгч байгаа” гэлээ.

Бид удахгүй ухаан алдаж унасан үйлчлэгтэй эмэгтэйтэй холбогдож, мэдээлэл хүргэх болно.