Хан-Уул дүүргийн 18 дугаар хороонд баригдаж байгаа барилгын кран унаж, хоёр хүн амиа алджээ. Тодруулбал, өнөөдөр 13:00 цагийн үед “Хүннү-2222” хорооллын баруун талд баригдаж байгаа барилгын кран унаж, хүний амь хохирчээ. Тус барилга нь Номин Констракшн Девелопмент группийн эзэмшлийнх байж болзошгүй талаар албан бус эх сурвалж мэдээлээд байна.

Энэ талаар ЦЕГ-ын Хэвлэл мэдээллийн төвийн дарга, хурандаа Б.Баатархүү “Хан-Уул дүүргийн 18 дугаар хороонд баригдаж байгаа байгууламж дээр ажиллаж байсан сунадаг авто кран унасан. Энэ тухай дуудлага өнөөдөр 12:52 цагт ирж, шалгалтын ажиллагааг явуулж байна. Бидэнд ирсэн мэдээллээр тус барилга дээр ажиллаж байсан Х /эр,36н/, Б /эр, 20н/ нар нас барсан. Хэргийг Хан-Уул дүүргийн Цагдаагийн нэгдүгээр хэлтэс шалгаж байна" гэв.