Хоёр жилийн өмнө Хөвсгөл аймгийн малчин залуу саахалт айлынхаа хоёр иргэнийг буудаж, амийг нь хөнөөсөн хэрэг гарч байлаа. Тодруулбал, тус аймгийн Жаргалант сумын II багийн малчин 23 настай Б гэгч нь бэлчээрийн маргаанаас үүдэн 51 настай эрэгтэй Б, 51 настай эмэгтэй М нарыг буудаж, амь насыг нь хохироосон болох нь тогтоогдсон юм. Тэрээр хэргийн газраас зугтаж, нэг хоногийн дараа өөрийнхөө амийг егүүтгэсэн байдалтай олдсон билээ.

            Мөн сар шинийн өдрүүдэд малчид бэлчээрээ булаацалдаж, маргалдсан хэрэг гарчээ. Тодруулбал, Хэнтий аймгийн ... сумын нэгдүгээр багийн малчин Б-ийн толгойд саахалт айлынх нь залуу буу тулгаж, дарамталсан хэрэг гарсан байна.

Энэ талаар эх сурвалж мэдээлэхдээ “Битүүний өдөр малчин Б-ийн толгойд буу тулгасан хэрэг гарсан. Цагдаагийн байгууллагад энэ хэргийг шалгаж байгаа ч хохирогч залуу өргөдлөө татсан гэсэн. Малчид сүүлийн жилүүдэд бэлчээрээ булаацалдах, нэгийгээ дарамтлах, айлгах сүрдүүлэх нь нэмэгдсэн. Манай сум хоёр сумын заагт учраас хэрүүл бүр ч их гарч байна” гэлээ.