Өнгөрсөн оны арваннэгдүгээр сарын 3-нд хичээлдээ яваад ор сураггүй алга болсон 16 настай Г охиныг онц хэрцгийгээр хөнөөж, цогцсыг нь мөчилж, шуудайнд хийн гудамжинд хаясан аймшигт хэрэг бүртгэгдсэн. Эл гэмт хэргийг талийгаачийн төрсөн ах С.Ганболд үйлдсэн болохыг цагдаагийн байгууллагаас шалгаж, тогтоосон байдаг. Түүнд холбогдох шүүх хурал болж, бүх насаар нь хорих ял оноосон билээ.  

          Тодруулбал, Чингэлтэй дүүргийн Эрүүгийн хэргийн Анхан шатны шүүх С.Ганболдыг хүнийг гэр бүлийн хүчирхийлэл үйлдэж, хөнөөсөн гэмт хэрэг үйлдсэн гэм буруутайд тооцож, Эрүүгийн хуулийн 10.1 дүгээр зүйлийн 2.8-д зааснаар бүх насаар нь хорих ял ногдуулж, уг ялыг хаалттай хорих байгууллагад эдлүүлэхээр шийдвэрлэснийг Давж заалдах шатны шүүх хэвээр үлдээсэн юм. 

Тэгвэл Улсын Дээд шүүхийн хяналтын шатны Эрүүгийн хэргийн шүүх хуралдаанаар С.Ганболдод холбогдох хэргийг шүүгдэгчийн өмгөөлөгчийн гаргасан гомдлын дагуу 2021 оны аравдугаар сарын 20-ны өдөр хянан хэлэлцжээ. Дээд шүүхээс С.Ганболдод холбогдох хэргийн зүйлчлэлийг Эрүүгийн хуулийн 10.1 дүгээр зүйлийн 1 болгон өөрчилж, эдлэх ялыг 15 жилээр тогтоосон байна.

         Талийгаач айлын ганц охин бөгөөд бага ах, ээжийн хамт Чингэлтэй дүүрэгт нийтийн байранд амьдардаг байсан. Гэмт хэрэгтэн охины цогцсыг мөчилж, хоёр шуудайнд хийн том ах нарынх нь амьдардаг гэрийн ойролцоо хаясан гэдэг.