Шадар сайд С.Амарсайханы тушаалаар Онцгой байдлын ерөнхий газрын дэд дарга нарыг үүрэгт ажлаас нь чөлөөлсөн байдаг. Тодруулбал, ОБЕГ-ын тэргүүн дэд, штабын дарга Ж.Чүлтэмсүрэн, дэд дарга, бригадын генерал Б.Ууганбаяр, дэд дарга, бригадын генерал Д.Намсрай нарыг чөлөөлсөн. Тэгвэл дээрх гурван дэд даргыг “Дүнжингарав”-ын дэлбэрэлтийн хэрэгт хариуцлага тооцож, ажлаас нь чөлөөлсөн гэх мэдээлэл хэвлэл мэдээллийн хэрэгслээр цацагдаад байгаа билээ.

Энэ талаар ОБЕГ-ын дарга Б.Ариунбуянгаас тодрууллаа.

-ОБЕГ-ын тэргүүн дэд, штабын дарга Ж.Чүлтэмсүрэн, Б.Ууганбаяр, Д.Намсрай нарыг чөлөөлсөн. Хариуцлага тооцож ажлаас нь чөлөөлсөн юм уу?

      -Ажлын хариуцлага тооцсон асуудал байхгүй. Энэ хүмүүс ажил, үүргээ хангалтгүй гүйцэтгэсэн гэдэг үндэслэлээр чөлөөлөгдөөгүй. Шадар сайдыг ийм үндэслэлээр энэ хүмүүсийг үүрэгт ажлаас нь чөлөөлөөгүй гэж ойлгож байгаа. Харин бүтцийн өөрчлөлтийн хөтөлбөрийн хүрээнд л өөрчилсөн. Дэд дарга нарын ажлын чиг үүрэгт тодорхой хэмжээний өөрчлөлт орсон учраас ажлыг нь өөрчилсөн гэж ойлгож байгаа.

-Энэ хүмүүс ОБЕГ-таа ажиллаж байгаа юу?

        -Ажиллаж байгаа. Удахгүй өөрсдийнх нь саналыг сонсож, шаардлагатай газар нь сэлгэн томилно. Харин тэтгэврийн нас нь болсон хүн байвал өөрийн хүсэлтээр гавьяаны амралтдаа гарч болно.

-“Дүнжингарав”-ын дэлбэрэлт болон бусад галаас үүдэлтэйгээр энэ онд таван аврагч амиа алдсан. Үүн дээр хэн нэгэнд хариуцлага тооцсон уу?  

         -Холбогдох албан тушаалтнуудад хариуцлага тооцсон. Хариуцсан гал унтраах хэлтсийн даргыг ажлаас нь чөлөөлсөн. Нийслэлийн гал хариуцсан дэд даргыг нь албан тушаал бууруулж, Сонгинохайрхан дүүрэгт сэлгэн томилсон. Мөн газрын даргат нь сахилгын шийтгэл ногдуулсан. Ийм арга хэмжээнүүдийг тухайн үедээ авсан.