УИХ-ын Тамгын газрын дэд дарга Э.Лхагвын Боловсролын яамны ТНБД Х.Батжаргал руу хүргүүлсэн “Битүүн шөл”-ний албан бичиг олон нийтийн анхааралд өртөж, шүүмжлэл дагуулаад байна.

Энэ талаар Боловсролын яамны ТНБД Х.Батжаргалтай холбогдож тодрууллаа.

        -УИХ-ын Тамгын газраас сурагчдын гэрийн даалгаварт “Битүү шөл” хийх санаачилга гаргаж, танд хүргүүлсэн байна. Уг уриалгыг ажил болгож, сурагчдын гэрийн даалгаварт өөрчлөлт оруулах уу?

-Хамтран ажиллах санаачилга гаргаж, уриалга дэвшүүлсэн байна лээ. Гэхдээ Боловсролын яамны зүгээс сурагчдын гэрийн даалгаварт өөрчлөлт оруулж, хэлээд байгаа хоолыг нь хийх чиглэл өгөх шаардлагагүй гэж үзсэн. Тийм учраас сурагчдын гэрийн даалгаварт битүү шөл хийх даалгавар өгөхгүй. Тэртээ тэргүй энэ ажлыг цахим сүлжээ хийгээд өгчихлөө. Эцэг, эхчүүд сошиалаас мэдээлэл аваад, хүүхдүүдтэйгээ хамт хийвэл тэр л биз.

       -Уг албан бичгийг танд хаяглаж явуулсан байна лээ. Та сошиал сүлжээнд байршуулсан юм уу?

-Энэ бол нууц бичиг биш, ил байдаг л мэдээлэл шүү дээ. Бид нууцын зэрэглэлтэй л бичгийг нууцална. Гэхдээ энэ бичгийг хэн, ямар зорилгоор сошиал сүлжээнд цацсаныг мэдэхгүй байна. Шуудан түгээгч, бичиг хэргийн ажилтнаар дамжигдаж, миний гар дээр ирж байгаа. Тийм учраас хаана задарч, хэн цахим сүлжээнд тавьж байгааг мэдэх боломжгүй.