Эрүүл мэндийн яамнаас мэдээлэл өгч байна. 11:00 цагаас хойш дөрвөн тохиолдол нэмэгдэж, нийт батлагдсан тохиолдол 582 болжээ. Энэ тохиолдол нь Дорноговь аймгийн Замын-Үүд суманд бүртгэгдсэн байна. Коронавирусээс хамгаалах хамгийн найдвартай арга хатуу хөл хорионы дэглэм гэдгийг албаныхан онцоллоо.

ХӨСҮТ-ийн эмч, сувилагчдаас арван хүн халдвар авсан

Энэ үеэр ХӨСҮТ-ийн тандалт судалгааны хэлтсийн дарга А.Амбасэлмаа "Батлагдсан тохиолдол бүрийг бид мэдээлж байгаа. Улаанбаатар хотод өнөөдөр бүртгэгдсэн таван тохиолдол бүгд халдварын ойрын тохиолдол. Караоке, цайны газарт орсон хүмүүсийн дунд халдвар гарч, орц байрандаа халдаасан байна. Энэ халдварын голомтыг нэгэнт хумиад авчихсан учраас заавал зарлах шаардлагагүй гэж үзэж байгаа. Батлагдсан тохиолдол бүрийн араас хөөцөлдөж байна. Шаардлагатай бол хаягийг нь зарлана. Манайхтай хамтарч хууль хүчний байгууллагууд ажиллаж байгааг хэлэх нь зүйтэй. Ер нь иргэнд шинж тэмдэг илэрвэл маш яаралтай эмнэлэгт хандах хэрэгтэй. Өрхийн эрүүл мэндийн төв болон ХӨСҮТ-ийн 100 болон 80086829 гэсэн дугаараар дуудлага өгч болно. Хүмүүсийн ажиглах тусгаарлах байранд орохоос өмнө явж байсан газруудыг нь бид зарлаж байгаа. ХӨСҮТ-ийн эмч, сувилагчдаас арван хүн халдвар авсан" гэв.