Хөвсгөлд далайд аялалд гардаг Сүхбаатар хөлөг онгоцыг үйлчилгээнд ашиглахыг хориглож, зөвлөмж хүргүүлсэн талаар мэдээлэл цацагдаад байгаа билээ. Тодруулбал, Мэргэжлийн хяналтын ерөнхий газар, Зам тээврийн хөгжлийн яамны харьяа Далайн захиргаатай хамтран Хөвсгөл аймгийн Хөвсгөл нуур, Архангай аймгийн Өгий нууранд усан замын тээврийн үйлчилгээ эрхэлдэг аж ахуйн нэгж, байгууллага, иргэдэд зургаадугаар сарын 21-30-ны өдрүүдэд зөвлөн туслах үйлчилгээ үзүүлсэн гэнэ. Энэ үеэрээ “Хөвсгөл усан зам” компанийн Сүхбаатар онгоцыг үйлдвэрлэгчийн зориулалтыг өөрчлөн, 140 хүн тээвэрлэхээр зорчигч тээврийн улсын бүртгэлийн гэрчилгээ авсан бөгөөд аврах завь болон усчин аврагч хүрэлцээгүй, үйлчилгээ эрхлэх тусгай зөвшөөрлийн хугацаа дууссан тул үйлчилгээнд ашиглахгүй байх талаар эзэмшигчид зөвлөмж хүргүүлээд байгаа аж.

Энэ талаар “Хөвсгөл усан зам” компанийн захирлаас тодрууллаа. Тэрбээр “Сүхбаатар хөлөг онгоц маань аялалдаа гарсаар байгаа. Аврах завь, усчин аврагч хүрэлцээгүй гэдэг нь ташаа мэдээлэл. Аврах хантааз зэрэг хангалттай, хүрэлцээтэй байгаа. Өмнөх жилүүдэд зорчигчдодоо хэрхэн үйлчилж байсан яг түүн шиг л үйлчилгээ үзүүлсээр байна. Тусгай зөвшөөрлийн хугацаа дуусаагүй, сунгалтаа хийлгэсэн. 140 хүн тээвэрлэх боломжтой бөгөөд одоогоор өдөрт 40-50 хүн үйлчлүүлж байна. Тасалбарын үнэ том хүн 36000, хүүхэд 15 мянган төгрөг хэвээрээ байгаа” гэлээ.